Yia eun ammin que nou aime tous bein,
Souvent quand n'ou l'vait vos donne eune poignie de main
Et nous sans être cruel, j'ly touonons souvent l'dos,
Car il est fort, mais y n'a que la pé et les os:
Chest notre parapuie.

Et jamais, nen jamais, y ne se mârie,
Qui faiche bé ou qui faiche grille, nait, ou puie,
Au contraithe il est tréjous là pour nos protégi,
Nia pas de soin pour ly s'il est chatchi ou mouoyi
Notre parapuie.

Il est l'ammin du p'tit aussi bein comme du grand,
Car y protège et abrite l'un et l'autre en mêne tant,
Et si n'est pas trop grand et as'il est bein portait,
Y peut nos protegi etout des ardeurs du Solet,
Notre parapuie.

Mais y ne faout pas qui scait mal usitait,
Car si par malheur il est eunne fais eusait,
Y ne scait pas longtemps à se trouvé triyi.
Et si y ne pouvait pas être ergrès, y sait fini
Notre parapuie.

Le secret pour le soignit et pour le bein préservé,
Y ne faout pas jamais le laissi mouaizi ni le rouolé,
Et si pur malheur il est un mio trop mouoyi,
Y faout bein vite l'ouvri et le laissi sitchi,
Notre parapuie.

Car tandi qu'il est oucouo eun mio bon,
Y peut servi en auotcheun temps comme bâton.
Il est utile et diversement k'mode
Et il est et y sca tréjous à la mode
Notre parapuie.

Quand nou est à se promené et que nou est en dimanchie,
Et que nou est attrapais dans eune achie,
Et si nou z-avait, par malheur, eun tout neu chapé,
Nou sait-i' contents d'avé prins avec sé
Eun parapuie.

"A friend in need is a friend indeed."