Les Pages Jèrriaises

Dans les cathédrales en Angliétèrre...

Le Ménage ès Feuvres,
St. Ouën.

Lé 15 dé juilet, 1967.

Moussieu l'Rédacteu,

Nou-s-en vait-i, man bouanhomme, des choses întérêssantes dans les belles grand' cathédrales et l's abbayes d'Angliétèrre! Nou-s-en vait mème tant qu'nou-s-en oublie quâsi la maîntchi par lé temps qu'nou-s-en a visité eune démié-douzaine! Et i' sont si belles qué nou pouorrait passer au mains un jour entchi dans châque. J'm'èrsouveins qu'la preunmié fais qué j'visitis la cheinne dé Cantorbéry j'y passis deux jours dé siette sans en r'sorti sénon pour prendre mes r'pas!

Chutte fais, j'en ai visité ieune ou pus touos les jours pour tchînze jours. Ieune des cheinnes qué j'trouvis hardi întérêssantes fut la cheinne dé Worcester, dédiée au Christ et à Nouotre Danme. J'avais tréjous ouï qu'deux Giffards, d'scendants des c'valièrs Giffard tch'étaient auve Dgillaume lé Contchérant à la Batâlle dé Hastings, avaient 'té êvêques dé Gloucester et d'Worcester respectivement, et comme ma m'mèe 'tait d'scendue - qu'j'ai tréjous ouï - des Giffards d'Angliétèrre, j'tais întérêssi d'dêcouvri s'nou viyait des monuments ès Giffards dans ches deux cathédrales-là. J'n'en vis pon autchun sîngne dans la cheinne dé Gloucester, mais j'n'eus pon d'peine à en trouver dans la cheinne dé Worcester. Dans chette-là, l'tombé d'l'Êvêque Geoffrey Giffard (1235-1302) habilyi dans ses vêtements sacèrdotaux, et mitré, est à côté d'la chantrerie du Prince Arthur, fils ainé du Rouai Henry sept. Es pids d'l'êvêque est l'tombé d'La Danme dé Clifford, femme en deuxième neuches dé Lord Giffard, tch'était pathenté à l'êvêque tch'est montré en êffigie sus san tombé, et tch'était probabliément lé d'scendant en lîngne directe du Seigneur dé Longueville en Nouormandie, dépis tch'i' portait l'titre dé Monseigneur.

L'histouaithe dé la cathédrale nouos dit qu'l'Êvêque Giffard né pèrdit pon d'temps d'vant asseûther s'n autorité sus les mouaines - la cathédrale étant un monastéthe dans chu temps-là - mais qu'en mème temps i' s'prouvit êt' lus beinfaiteur, car il empêchit les Papes dé Rome d'êglièrvi lus sou et lus trésor. Il' en étaient si r'connaissants qué quand i' mouothit i' lus décidîdrent dé nouôri treize pauves pèrsonnes lé jour d'annivèrsaithe dé sa mort pour tréjous. Faut penser qu'chutte couôteunme-là duthit jusqu'à la dissolution des monastéthes par le Rouai Henry VIII.

Un aut' pèrsonnage tch'est întérêssant pour les Jèrriais, et tch'est entèrré dans la cathédrale dé Worcester, est lé Rouai Jean. I' pathait qué d'vant mouothi il avait exprînmé lé d'si d'êt' entèrré en d'vant du maitre-autel, et san corps fut apporté dé Newark et entèrré-là entre les tombieaux des saints Oswald et Wulstan en 1216. Ch'tait en 1215 tch'il avait scêllé la Grande Charte à Runnymede, ch'est en tchi i' n'vêtchut qu'un an auprès ch'la. V'la tchi lî fit p't êt' mal au tchoeu d'aver à scêller chu dotchûment-là a l'înstance dé ses barons! Son côffre fut ouvèrt en 1797 et sa stchélette fut trouvée entchiéthe et en bouan êtat. Un os d'san ponché fut mîns d'côté, et est montré dans eune pétite bouaîte atout un couvércl'ye en vérre.

Eune aut' cathédrale tch'est mangnifique est la cheinne de Durham, dêdiée, étout, au Christ et à La Sainte Vièrge Marie. Dans l'but d'l'ouest, eune chapelle appelée La Galilée (viyant qu'la procêssion du Dînmanche finissait d'chu but-là - sŷmbole du r'tou du Seigneur à Galilée) fut bâtie en 1175. Dans l'mitan d'la chapelle nou vait la tombe au Vénéthabl'ye Bede (675-735), mouaine et historien si bein connu par les savants d'l'églyise Anglyicane. San corps y fut apporté en 1370.

Dans la bibliothèque de la cathédrale - tch'était la chambre où'est qu'les mouaines couochaient - j'vis eune chose întérêssante tchi montre qué la langue Nouormande n'a pon couo tout-a-fait dispathu, mème en Angliétèrre. La pèrmission d'la Reine, donnée au Douoyen et Chapitre d'eune cathédrale pour lus pér-mett d'êlithe un êvêque, est appelée Congé d'élire et dans la bibliothèque y'en a deux, iun a côté d'l'autre, sîngnés par les deux Reines Élizabeth respectivement. L'preunmyi est sîngné par la preunmié Reine Élizabeth (1533-1603), et est mangnifiquement êcrit sus parchémîn. L'deuxième, êcrit à la machinne sus du papi vêlîn, est sîngné par la Reine Élizabeth II d'a ch't heu. Ch'est întérêssant d'vaie les deux sîngnatuthes du mème nom sîngnées quat' chents ans à part! La sîngnatuthe dé la preunmié Reine Élizabeth est ornée et montre qu'oulle avait eune belle main d'êcrituthe.

Les monuments tch'ont eune connexion auve La Nouormandie ont tréjous un întéthêt spécial pour mé, et dans la cathédrale dé Gloucester, dêdiée à l'Apôtre St. Pièrre dans l'temps qu'oulle 'tait un monastéthe Bênédictîn et nouvellement dêdiée à La Sainte et Îndivisibl'ye Trinneté quand l' Rouai Henry VIII ordonnit la dissolution des monastéthes nou vait, dans l'chant - en d'vant du maître-autel - un tombé sus tchi s'êrpôse eune êffigie dé Robert, Duc dé Nouormandie, tchi mouothit en 1134. Il 'tait l'aîne des fis d'Dgillaume lé Contchérant. L'êffigie est en parfait ordre et est supposée êt' eune mangnifique èrsembliance du duc, mais jé n'pus pon dêcouvri s'il est actuellement entèrre dans la cathédrale.

George d'La Forge
 

Viyiz étout:

 

Les Pages Jèrriaises