Au c'menchement du seizième siecl'ye ou p'têtre à la fin du tchinzième, plusieurs Seigneurs des pus importants Mangnièrs en Jèrri, lus app'litent par lé nom dé lus Mangni, par exempl'ye, Moussieu dé St Ouen, et au passant des années, chutte pratique-lâ fut adoptée par touos les autres Seigneurs.
I' nos est dit qu'un certain Seigneur hautain de la Trinn'té dé chu temps là, fut invité en Normandie à un bantchet donné par les Seigneurs normands. Il arrivit à la derniéthe minnute pa'ce qu'i' voulait être seux de s'faithe vaie.
Un Maître dé Cérémonies qui 'tait mâté à l'entrée dé la Grand' Salle démandit lé nom des Seigneurs et pis il annoncit chatchun à haute vouaix. Quand i' d'mandit lé nom au dèrnyi entré, i' rêponnit qu'i' 'tait 'Lé Seigneur dé la Trinn'té'. Etonné, l'homme sé grattit la tête et lé Jèrriais li dit pour entre deuxième fais.
Troublié, le pouorre Normand li 'rdémandit san nom. Tous attendaient pour oui. Tapant san bâton d'office, lé Maître dé Cérémonies annonçit à touos les gens présents: 'Messieurs - Lé Bouon Dgieu!'
Viyiz étout: