Fort Lauderdale, Florida,
U.S.A.
Lé 19 d'avri, 1975.
Moussieu l'Rédacteu,
La bouannefemme Missis Le Cornu, née Bichard, vînt nouos vaie eune séthée siez Papa à La Forge quand j'tais mousse. Veuve dépis bein d's années, et pâssé sa huiptantaine, oulle 'tait ieune des anciennes du vaîsinné et les gens l'appelaient “Manman” L'Cornu.
“Y'a longtemps qu' ou n'tiez pon v'nue nouos vaie,” Papa lî dît.
“Eh bein, Maît George,” ou lî dît, “pour eune pèrsonne dé m'n âge, jé n'peux pon m'pliaindre affaithe dé santé. J'peux acouo liéthe 'La Chronique' sans leunettes, mais l'âge est là quand mème et j'aime mus m'èrnarder au coin dé m'n âtre au sé qué d'quéner les c'mîns et embêter les gens.”
“J'vouos asseuthe,” Papa lî dît, “qu'ou-s'etes la beinv'nue ichin autcheun temps. J'sommes bein contents d'vouos vaie. J'n'ai janmais oublié tch'i' y'avait d'la pathenté dans nouos fanmiles dans les vièrs temps. Vouos r'souv'nous qué j'vouos avais dit qu' ieune d'vouos anchêtres, Jean Bichard, 'tait l'parrain dé m'n anchêtre Aaron L'Feuvre tchi fut bâptisi en mil, siez chent chînquante-sept?”
“Ma fîngre, à ch't heu qu' tu l'dis,” ou s'fît, “i' m'sembl'ye qué tu m'en avais pâlé, mais jé c'menche à pèrdre la mémouaithe. Mais où'est qu' tu'as 'té dênichi ch'la?”
“Dans les r'gistres d'bâptêmes,” Papa lî dît.
“Eh bein,” nouos dît Manman L'Cornu, “j'n'ai janmais ouï pâler d'chu Jean Bichard là. Ch'n'est pon ravissant quand nou pense qué y'a trais chents ans tch'il est mort. Mais créthais-tu qu'j'ai connu un homme tchi fut né en mil, sept chent vingt-sept, mé? Ch'tait man grand-grand-péthe Sébastien Bichard. Nouos v'là dans l'année mil, neu chents et j'ai huiptante-trais ans, ch'est en tchi j'fus née en mil, huit chent dgiex-sept. Sébastien Bichard mouothit en mil, huit chent vingt-chînq à l'âge dé nénante-huit quand j'avais huit ans, et j'm'èrsouveins tout à fait bein d'lî. I' m'assiévait sus ses g'nouors quand man p'pèe m'emmenait auve li l'vaie au Dînmanche l'arlévée.”
“Av'ous dit Sébastien Bichard?”, Papa lî d'mandit.
“Oui!”, ou lî dît. “Ch'tait là san nom.”
“Eh bein,” s'fit Papa, “né v'la acouo eune raison d'pus tchi m'fait penser qué l' Jean Bichard tch'était iun d'vouos anchêtres en 'tait iun des nouotres étout, car il 'tait fis Jean, fis Sébastien. Quand nou consulte les r'gistres d'naîssances nou vait qu' les mème noms 'taient souvent continnués d'généthâtions en généthâtions dans les vielles fanmiles. Et les r'gistres d'St. Ouën donnent un tas d'înformâtion. Dans chu cas, ch'est mèrtchi net et cliai: Aaron L'Feuvre, fis d'Aaron L'Feuvre, présenté au bâptême par Jean Bichard, fis Jean, fis Sébastien, et Judith, sa soeu, lé vingt-sept dézembre mil, siex chent chînquante-sept. Lé nom d'la femme à Aaron L'Feuvre n'est pon mentionné, mais i' n'y a pon d'doute dans m'n idée qu' oulle 'tait eune Bichard, car pour des siècl'yes ch'a 'té la couôteunme en Jèrri d'aver oncl'yes et tantes comme parrains et marraines.”
“Viy'ous bein chenna!” s'fit Manman L'Cornu. “Tch'est tch'éthait creu qué l's anciens éthaient ieu l'idée d'mett' tout ch'là bas dans des livres. Et mé tchi criyais tch'i' n'savaient liéthe ni êcrithe dans ches vièrs temps-là!”
“Eh bein,” Papa lî dît, “i' faut avouer qu' St. Ouën 'tait dêjà l'avant d's aut' pâraisses y'a trais chents ans. J'ai veu les r'gistres d'à bein près toutes les pâraisses, et les nouotres donnent lé pus d'înformâtion au sujet d'péthe et méthe et parrains et marraines.”
“J'n'en sis pon ravie,” ou lî dît “Dépis qué j'mé connais, j'ai tréjous ouï qu' St. Ouën 'tait à la tête dé toutes les aut' pâraisses!”
“Jé n'peux pon aller si liain dans l'pâssé comme vous,” Papa dit à Manman L'Cornu. “Mais l'George, ichîn, s'i' vit à vouot' âge i' pouorra dithe tch'il à connu eune pèrsonne née en mil, huit chent six, car sa grand-grand-méthe, ma m'mèe - née Elizabeth L'Brun - tchi mouothit y'a chînq ans à l'âge dé huiptante-neuf, fut née ch't ' année-là, et i' l'a bein connue.”
Manman L'Cornu s'touânnit à mé et m'dit: “Tch'il âge qué tu'as, man p'tit?”
“J'ai neuv ans, Manman L'Cornu,” j'lî dis.
“Tu t'èrsouveins bein d'ta grand-grand-méthe?” ou m'dit.
“Mais véthe,” j'li dis. “J'avais quatre ans quand ou mouothit. J'allais la vaie souvent au Ménage ès Feuvres pas bein liain d'ichîn, et ou m'donnait eune gâche à fouée touos les vendrédis quand ou' fouângnait.”
“Mais tu t'èrsouveins des choses tchi s'pâssaient quand tu n'avais qu' quatre ans?” ou m'dit.
“Pas d'un tas,” j'li dis, “mais j'n'oubliethai janmais ma grand-grand-méthe tchi m'était si bouanne.”
À ch't heu qué j'dêpasse les huiptante-trais ans qu' la bouannefemme Missis Le Cornu avait dans chu temps-là, et qué j'sis tchiquefais assis à reunminner au pid d'l'âtre dans la salle au Ménage ès Feuvres, i' m'sembl'ye qué j'la vai acouo assise au coin d'l'âtre, à côté d'la filyie, ma grand-grand-méthe, atout san pot à s'no à côté d'lyi!
George d'La Forge
Viyiz étout: