Trenton, Michigan,
U.S.A.
Lé 20 d'novembre, 1971.
Moussieu l'Rédacteu,
Y'a tchique temps, dans ieune dé mes lettres, j'vouos disais combein dû qu' Moussieu d'St. Ouën (Hélier de Carteret) et sa danme avaient travailli à dêfrichi la tèrre et bâti Seigneurie, maisons, et offices dans l'ile dé Sèr - sans doute auve l'aîgue des quarante fanmiles tchi s'en fûdrent la coloniser auve ieux en 1565.
En 1580, tchînze ans pus tard, Philippe de Carteret, lé grand des fils du Seigneur, avait 26 ans, et dans l'Chapitre 45 des “Chroniques de Jersey” (dont l'auteur est înconnu), i' nouos est dit qu' Philippe 'tait fort, dé bouan tchoeu, sage, discret et modeste, et qu' san p'pée lî donnit la chèrge du gouvèrnément dé toute l'ile dé Sèr, avec tout l'èrvénu et profit d'l'île. I' pathaît tch'i' s'comportit si bein tch'i' gangnit l'approbâtion d'san p'pèe et d'sa m'mèe, et l'respé dé touos l's habitants d'Sèr, et Moussieu et Madanme dé St. Ou pensîdrent tch'il 'tait temps qu'lus fis, tch'était à gouvèrner si bein, s'mathyisse à eune fille dé fanmile nobl'ye pour li-aîdgi à souangni d'La Seigneurie, et li'apporter du confort et du souôtchein.
Il' eûdrent l'avis dé l'consulter pour vaie s'il avait fait s'n idée sus autcheune janne fille dé Ser, mais i' lus dit qu' nannîn et qu' san chouaix 'tait Mad'mouaiselle Rachel, fille dé George Poulet, Étchuyer, Lieut'nant du Gouvèrneux, Messire Amice Poulet, san fréthe. Comme Mad'mouaiselle Rachel Poulet 'tait la seule héthitchaithe dé san p'pèe, et d'fanmile nobl'ye du côté d'péthe et méthe, tch'était la fille dé Moussieu d'Rôzé, lé Seigneur Hélier de Carteret et sa danme 'taient contents d'san chouaix et allîdrent [vaie] l'Sieur Poulet pour lî d'mandé [la] main d'sa fille pour lus fis, [et la] rêponse fut favorabl'ye. Ch'tait un bouan mathiage du point d'veue d'Moussieu d'St. Ouën viyant qu' v'la tchi faîsait bouanne alliance entre lé Châté d' Mont Orgueil et sa Seigneurie et Fief Haubert.
Lé mathiage eut lieu au Châté lé 10 d'janvyi, 1580. Ch'tait l'Minnistre Arthur Walke, du Châté, tchi les mathyit. Moussieu et Madanme dé St. Ouën, Amice de Carteret, lus fis piêné, et Philippe et tout lus train sortîdrent du Mangni d'bouan matîn pour aller au Châté à Gouorray, et toute la pâraisse 'tait assembliée d'vant la grand'porte du Mangni atout lus gros canons et lus arquébûses, et la couleu strélîndgie. I' lus mîndrent en c'mîn au son du gros tambour et au feu des canons.
Il' allidrent par l'églyise dé St. Pièrre, et les St. Pièrrais et les St. Bréladais 'taient à l's attendre près d'l'églyise atout chatchun lus canons et arquébûses et couleurs strélindgies étout. Jé n'm'en vais pon vouos enn'yer auve un tas d'répétitions, mais la j'vaûchie continnuit san c'mîn par la Vallée d'St. Louothains et la Ville dé St. Hélyi (St. Sauveux s'était adjoint à St. Hélyi), et les canons et arquébûses fûdrent tithés à chaque arrêt, et les tambours battant aîdgaient à célébrer l'occâsion.
Dé là i' s'en fûdrent par lé Mangni d'Samathés, et Moussieu Jean Dumaresq, lé grand des fis du Seigneur du Vinchelez et Bailli d'Jèrri dans chu temps-là, sé mathyit l'mème jour au Châté à Mad'mouaiselle Esther de Samathés.
Ch'fut don un doubl'ye mathiage au Châté chu jour-là, et i' pathaît tch'i' y'eut un rêvillon dans toute l'Île. Mais tchi tîntamarre pour célèbrer un mathiage! Milice, canons, arquébûses et tambours! J'pense bein qu' les campangnards dé chu temps-là 'taient si assujétis à lus Seigneurs tch'i' n'pouvaient pon faithe autrément qué d'montrer lus dêvouement à l'occâsion, et pis, étout, i' n'pouvaient pon affaûrder grand' sorte d'rêvillon et d'cérémonie quand i' s'mathyaient ieux-mèmes, et v'la tchi lus donnait eune chance d'êt' conviés et d'lus rêjoui un mio.
Chînq ans pus tard, Philippe de Carteret 'tait Seigneur dé St. Ouën, et il 'tait (d'après “Les Chroniques”) lé chînquante-neuvième titré dé sa Seigneurie et Fief Haubert. “La Chronologie d'Jèrri” nouos dit qu'en 1607 i' fut ordonné d'pathaître dévant les “Commissaires” dé La Reine pour aver condit sa Cour dans les ruinnes du Châté d'Gros Nez, mais i' n'est pon dit s'i' fut r'prînmandé.
Jé n'sai pon combein d'êfants tch'il eut, mais lé 18 janvyi, 1626/27, san fis, Messire Philippe de Carteret, Seigneur dé St. Ouën à san tou, fut assèrmenté Bailli, et “Les Tableaux Historiques” nouos disent tch'i' 'tait “Calviniste et Puritain dès son enfance sous la direction de sa mère Rachel Paulet”, et i' d'vînt anmi auve Pryne, lé célèbre prisonnyi d'Êtat au Châté Mont Orgueil. I' fut nommé Lieut'nant Gouvèrneux lé 19 juilet, 1634, mais sa carriéthe fut troubliée. Ouaithe tch'il 'tait Puritain, il avait prîns la part du rouai contre lé Parlément en 1641, et i' s'trouvit en embarras auve lé parti parlémentaithe, dé tchi l'Douoyen Bandinel et l'Juge Michel Lemprièthe 'taient à la tête, et comme lé Juge avait un Mandat du Parlément Angliais pour sén arrêt, i' s'réfugyit dans l'Châté Élizabeth et y mouothit lé 23 d'août, 1643.
George d'La Forge
Viyiz étout: