Fort Lauderdale, Florida,
U.S.A.
Lé 6 d'avri, 1974.
Moussieu l'Rédacteu,
Eune lettre d'un anmîn en Jèrri m'annonce lé décès d'un aut' Jèrriais distîndgi - Messire Daniel Cabot - et j'fais part dé mes condoléances à sa danme, qué j'ai ieu l'pliaîsi d'connaître pour bein d's années. J'dis un “autre” Jèrriais distîndgi car i' n'y a pon longtemps qué j'viyais l'décès d'Lord Coutanche dans la gâzette, et y'a eune sémaine la gâzette, et y'a eune sémaine la gâzette du 7 févri m'annonçait l'décès du Général Messire Frank Messervy. V'la tchi m'ramémouaithe qué quand j'èrvîns en Jèrri en 1946, l'année qué j'm'èrtithis d'affaithes, lé Général Neville Godfray Hind m'învitit à pâsser eune séthée siez li à Longueville et tch'i' m'montrit un tas d'portraits prîns à la dgèrre en Êgypte dans tchi tch'il' 'taient prîns ensembl'ye sus l'camp d'batâle d'Alamein li (l'Général Hind) et l'Général Messervy auve lé Feld-Maréchal Lord Wavell.
J'viyais dans la gâzette tch'i' visitit Jèrri y'a eune vîngtaine d'années, l'Général Messervy, et tch'i' rencontrit d'la pathenté à la Trinneté. J'pense bein qu' Alfred George Messervy, Êtchuyer, d'Brabant, Trésôryi des împots quand j'tais dans “Hill Street”, 'tait iun d'ses pathents. J'allais souvent à Brabant pour eune gamme dé “tennis” dans chu temps-là. La dreine fais qué j'm'èrsouveins d'aver veu l'patriarche d'la fanmile, lé Juge Alfred Messervy, 'tait à Carteret, en Nouormandie, où'est qué jé v'nais d'faithe eune touannée en “bicyclette” par Bricquebec, Les Pieux, St. Vaast, etc., auve l'Avocat Edmund Toulmin Nicolle. En r'vénant, j'arrivînmes là en mème temps qué l'Juge et j'dinînmes ensembl'ye en attendant pour lé baté tchi nouos ramenit à Gouôrray.
Quand nou pense à la grandeu (j'dév'thais p't êt' dithe la p'titesse?) dé Jèrri compathée à l'Angliétèrre, ch'est r'mèrquabl'ye qué y'a ieu tant d'ses fis tch'ont monté au rang d'Général, sans pâler des cheins tchi sont v'nus au rang d'Amitha, comme l'Amitha E. de Faye Èrnon, tchi mouothit y'a tchiques années, et l'fanmeux Amitha d'Auvèrgne, Prince dé Bouoillon, et d'aut' dévant li. Et j'avons ieu d's officièrs dé haut grade dans l'Armée des Airs étout. Lé “pourcentage” d'officièrs tchi monte à ches rangs-là est bein p'tit, et Jèrri dév'thait êt' bein ordgilleux d'en aver ieu tant. I' n'y a qu' à êtudier l'livre dé biographies êcrit par lé Révérend George R. Balleine pour vaie qu' l'histouaithe des Jèrriais tchi sé sont distîndgis avau l's années vaut la peine dé liéthe.
I' n'faut pon oublier, n'tout, qu' j'avons mème un Jèrriais parmi les saints - Saint Hélyi! Y'en a, sans doute, tchi s'en vont m'dithe qu' Hélyi n'tait pon Jèrriais d'naîssance. Mettons tch'il' aient raîson, nou peut au mains r'cliâmer tch'il 'tait Jèrriais par adoption! J'aimethais penser qu' Saint Ouën 'tait un Jèrrais, mais i' faut s'contenter à la pensée tch'il 'tait p't-êt' Nouormand. Saint Lucas d'vait êt' Nouormand étout. I' y'a lieu d'craithe tch'il 'tait p't-êt' bein connu d'nouos touos vièrs anchêtres, car il' înventidrent un diton à s'n êgard : À la Saint Lucas, tchil'ye des mêles si tu'en as!” S'i' fallait chouaîsi un vraie Jèrriais d'ma connaîssance pour entrer dans la Commeunion des Saints, man chouaix s'sait l'défunt Canon Matchi L'Mathinnée, d'mémouaithe respectée.
En liêsant la gâzette du 7 févri, j'vai qu' la renchiéthe tch'aîgue à viédgi les pouchettes à tout l'monde, ichîn comme en Jèrri, s'en va augmenter l'prix du lait et du whisky, d'dginne et d'la biéthe. Tant piéthe pour lé lait, car né v'la eune bouaisson tch'est nécessaithe et tchi fait du bein au saint-doux comme au vilain. Quant à la litcheu et la biéthe - tant mus. V'là tchi n'mé fait pon peine, mais j'crains qu'un tas d'ouvrièrs rapportéthont mains d'gages à lus bouannefemmes lé vendrédi au sé auprès lus visite à l'aubèrge en rentrant d'lus travas.
En pâlant d'aubèrges, quand j'vai dans la gâzette qu' un mousse dé 16 ans fut présenté d'vant Justice, pour aver 'té trouvé en bouaisson ayant bu sept Pèrnods dé trip'ye forche (la valeu d'vîngt-tch'iuns Pèrnods ordinnaithes), chîn pîntes dé biéthe et du whisky en mème temps, nou sé d'mande tch'il aubèrgiste ou aubèrgistes tchi peuvent êt' coupabl'yes dé li' aver sèrvi toute chutte bouaisson-là. I' dév'thaient êt' poursuivis en Justice étout et pèrdre lus licences. Ch'n'est pon ravissant qué l'pouorre mousse fut trouvé încapabl'ye et malade sus la cauchie et eut à êt' env'yé à l'Hôpita. Chutte quantité d'bouaisson 'tait assez pour lé tuer, sans pâler dé l'faithe vômi sa mule. S'i' continnue à s'comporter d'mème i' né f'tha pon d'vièrs os et i' faut espéther qué la Cour Rouoyale a trouvé l'mouoyen dé l'couothi maugré li.
George d'La Forge
Viyiz étout: