Le Ménage ès Feuvres,
St. Ouën.
Lé preunmyi d'juilet, 1972
Moussieu l'Rédacteu,
J'vai souvent des lettres dans vouot' bouanne gâzette êcrites par des pèrsonnes tchi trouvent à r'dithe sus nouos louais, nouot' Chambre Législative et à bein près sus tout. Mais j'ai r'mèrtchi qué ch'est tréjous des gens tch'ont des noms tchi n'sont pon vrais Jèrriais.
Dans la gâzette du 27 juîn i' y'en avait ieune, dé ches lettres-là, tchi nouos dîsait qué j'allons aver eune êlection pour siex Sénateurs dévant la fîn d'l'année, et qu'ch'est seux tch'i' y'étha un manque d'întéthêt dans l'êlection d'la part des êlecteurs. Et pis i' nouos donne sept raisons pour. Entr'autres, i' mentionne qué les candidats sont d'la clâsse des prîncipaux d'pâraisse, îndépendants, et tch'i' n'sont pon connus par la mâjorité d's êlecteurs, prîncipalement les jannes. Et tch'i' n'y a pon telles chose comme la démocratie en Jèrri, et qu'un ouvriyi n'a pon d'chance d'êt' êlu, etc. Et pis i' finnit par nouos dithe qué l'gouvèrnément démocratique d'Angliétèrre est supèrbe et admithé par lé monde entchi!
La chose tchi vouos frappe lé pus en liêsant tout chu bèrnîn-là, prîncipalement quand i' veint d'la plieunme dé gens auv des noms Angliais, est qu'ch'est la législâtion d'nouos Êtats, composés d'membres tchi sont supposés êt' si bachouards et îndépendants et d'la clâsse dé prîncipa d'pâraisse, tchi l's a faits tchitter l'Angliétèrre et san gouvèrnément démocratique et admithé par tout l'monde, pour s'en v'nîn d'meuther en Jèrri! Nou créthait qu'ayant dêcouvèrt qué les membres dé nouos Êtats sont si arriéthés et bachouards, i' s'en r'îthaient en Angliétèrre par lé préchain baté pour joui d'la vie souos l'gouvèrnément si démocratique et admithabl'ye! I' n'pathaîssait pon trouver ch'là drôle qué les vrais Jèrriais n'lus en pliainnent pon, d'nouot' gouvèrnément comme il est constitué. Et quant à la démocratie, y'en a d'toutes les sortes. Les gouvèrnéments Russes et Chinnouais s'appellent des démocraties, et y'a la difféthence dé la niet au jour entre ieux et la démocratie Angliaiche et Améthitchaine. Et quand à êlithe des ouvrièrs ès Êtats, l'affaithe pathaîtrait bein si lus sŷndicats l's ordonnaient d'sé mett' en grève d'un moment à l'autre!
Ch'est mangnifique dé vaie les lettes dans la gâzette nouos pâlant du temps pâssé et des boutiques qué nou viyait dans les rues d'la ville mais tchi sont rempliaichies par des bâtisses et façades modèrnes au jour d'aniet. J'm'èrsouveins bein d'un tas d'ches'-là, et j'pouôrrais p't êt' en nommer tchitch'eunes qué j'n'ai pon veu mentionnées. Par exempl'ye, j'n'ai pon 'couo veu pâler d'la Vèrte Porte et du sno à Simonet, et d'la boutique à vièr fé d'Hunt dans la Rue Conway. Dans La Rue d'Driéthe (King Street à ch't heu) y'avait la p'tite couotuth'thie à Maît' Walter Bisson. I' m'sembl'ye qu'oulle 'tait quâsi à la carre dé Halkett Place, où'est tch'i' y'a deux neuves boutiques à ch't heu. J'y pensais, à chutte couotuth'thie-là, l'aut' jour quand j'viyais l'tombé au Sieur Bisson dans l'chînm'tchiéthe au Mont à l'Abbé. Ma couôsinne Hilda L'Feuvre (pus tard Mme. Walter Ernest Le Gros), tchi r'pose dans l'chînm'tchiéthe dé Beechwood à Ottawa, au Cannada, où'est qu'man p'pèe et ma m'mèe sont entèrrés étout, avait travailli d'dans. La fille du Sieur Bisson, Madanme Veuve Lilian Le Grand, d'meuthe à Victoria dans la provînce dé La Colombie Britannique, au Cannada. Quand ou s'en îtha, chutte fanmille-là s'sa péthînmée.
En fache dé la couotuth'thie, d'l'aut' côté d'la rue, y'avait eune pétite boutique à p'tun tch'appartenait à un Sieur de Gruchy, fréthe du défunt Sieur George Noël de Gruchy tchi fondit l'garage à St. Pièrre. Il' 'taient les fis du Cap'taine de Gruchy tch'était en chèrge des Abattoirs dans chu temps-là, et l'révérend Francis de Gruchy, MA, Recteu d'St. Pièrre, dé mémouaithe respectée, 'tait l'fréthe au Cap'taine.
Jé d'meuthais à La Mouaie à St. Brélade dans chu temps-là, et j'tais dans l'office à Moussieu Charles William Binet. J'allais en ville par lé "train" du Jersey Railways & Tramways Limited. Ch'tait un pliaîsant viage touos les matîns, car nou viyait les mèmes pèrsonnes et nou v'nait à s'entr'connaître bein. Lé défunt Juge John Edward Le Boutilyi, d'La Sèrgenté, 'tait iun des cheins tchi viageait en ville dé la stâtion d'La Mouaie. À St. Aubîn, lé défunt Sieur de la Haye, tch'avait eune boutique à p'tun dans La Rue d'Driéthe, en fache dé la grand' boutique à A. de Gruchy et Cie., et l'Sieur Harold Dart, acouo en plienne vie dans sa huiptantaine, montaient à bord et j'nouos assiévions tréjous ensembl'ye. À Bieaumont, lé Sieur Hedley Le Riche Edwards, pus tard Avocat et Juré-Justicier, dé mémouaithe respectée, s'assiévait auve nous.
J'tais bein content d'liéthe la lettre dé Moussieu Ph'lippe Syvret, dans la gâzette, nous disant tch'il 'tait à la fête du Jubilé d'la Reine Victoria. Comme j'vouos l'disais la s'maine pâssée, j'y étais étout. J'mé d'mande combein tch'i' y'avait d'aut' Jèrriais là tchi sont en vie à ch't heu. I' s'pouôrrait tch'i' y'en a pus qu'nou n'créthait.
George d'La Forge
Viyiz étout: