San Antonio, Texas, USA.
Lé 5 dé mar, 1983.
Ouaithe tch'i' y'a quâsi trais mais qu' man fréthe Fraînque n'est pus d'chu monde, jé l'manque acouo. Ch'est dû pour mé dé m'mett' dans la tête tch'il est au r'pos êtèrnel, car j'tions pus qu' fréthes. J'tions parchonnièrs dans nouot' connaissance dé la vie du temps pâssé, et nou-s-en pâlait souvent l'sé quand j'tions dans nouos grand'tchaises à l'entou d'l'âtre à reunminner entouôrre l's êvènements du jour (en Jèrriais, sans doute) dévant s'couochi. Et la compathaison dé tchique affaithe actuelle à eune pathelle tch'eut lieu en Jèrri y'a septante ou huiptante ans v'nait tchiquefais sus l'tapis. Ch'est r'mèrquabl'ye comment qu' tchiquechose dé même s'arrive. L's Angliais ont un diton tchi nouos dit qué l'histouaithe s'èrpète, et ch'est bein vrai.
Nou reunminnait pour eune volée et quand nou c'menchait à s'êbailli auprès aver dit "T'èrsouveins-tu?" eune chentaine dé fais en pâlant d'nouot jannèche ensembl'ye à St Ouën, et disposé d'la r'souv'nance en tchestchion, et tch'il 'tait temps d'aller s'couochi, j'mé mâtais sus mes pids d'driéthe et j'disais: "Eh bein, il est temps de s'tâner. Ch'est d'aller s'couochi et nou s'èrvèrra démain au matin si l'Bouân Dgieu l'pèrmet."
Comme j'l'ai probabliément mentionné d'vant, il 'tait farceux, l'Fraînque. J'n'en ai janmais veu un aut' tchi pouvait jouer autant d'farces sans et' dêcouvert. J'm'èrsouveins du temps tch'il eut d'l'empliai comme tchèrpentchi à bâti d's' appartènements ès bèrrexes d'St Pièrre. Il avait à peine finni d'apprendre sa vocâtion siez Mait' Fred de Caën à Millais dans chu temps-là. Il allait d'La Forge ("Mossgiel" à ch't heu) ès bèrrexes en bicyclette touos les matîns. I' faisait d's anmins aisiement, car il 'tait bein aimabl'ye li-même.
Iun d'ses grands anmîns d'meuthait en ville et v'nait ès bèrrexes en bicyclette étout. Mais il avait eune mauvaise habitude qué Fraînque n'aimait pon. Ch'tait d'mett' des bouâns buts d'bouais dans san pagas touos les sièrs en tchittant l'travas pour les faithe sèrvi à alleunmer san feu en ville lé lendemain au matîn pour graie san dêjeuner. Fraînque, accouôteunmé dès ses p'tits jours à couoyer, m'ttait les buts d'bouais d'côté tch'étaient longs assez pour faithe sèrvi à rhabilyi au bésoin, et i' n'aimait pon les vaie sèrvi d'bouais à feu d'même.
Eune arlévée nouot' villais en avait mîns eune demié-douzaine dé buts dans san pagas, muchis souos des rabotîns, et s'en 'tait allé changi ses habits d'travas quand Fraînque, dgettant sa chance, halit l'bouais dé d'dans l'pagas et lé rempliaichit atout un coupl'ye d'briques, et les couvrit bein auve les rabotîns.
Quand l'anmîn villais allit pour faithe san feu atout bouais et rabotîns et graie san dêjeuner en ville lé lendemain au matîn, i' trouvit les briques. I' n'avait pon d'bouais à feu d'êpaingne et il eut à s'en aller sans dêjeuner. I' n'tait pon seulement marri, il 'tait futhieux, sustout viyant tch'il avait ieu à porter les briques en ville dans san pagas! Sans doute , Fraînque fît s' n'innocent quand s'n anmîn villais li contit ses peines, mais i' n'sut janmais tch'est tchi li'avait joué chutte farce-là. Et Fraînque n'avait autchun r'mords dé conscienche, car i' y'avait un tas d'mios d'bouais souos pid tchi pouvait sèrvi comme bouais à feu.
Dans chu temps-là quâsi touos les travailleurs faisaient sèrvi des bicyclettes, et y'en avait tant par les c'mîns quand l's'heuthes dé travas finnissaient, qué la clioche sus les manchelles était importante pour avèrti les piêtons dé s'dêcârrer au bésoin. Eh bein, ieune des farces dé Fraînque 'tait dé mettre un p'tit lopîn d'poté dans la clioche. Sans doute, ou r'fûsait d'sonner quand l'cycliste en avait bésoin, et y'avait tchiquefais des p'tites collisions, ch'est en tchi Fraînque né s'pèrmettait pon d'jouer chutte farce-là souvent.
Eune aut' farce tch'il aimait à faithe 'tait d'mett' eune pétite couoche dé peintuthe en d'ssous des pouangnies d'portes, et nou ouïyait souvent des juthements quand tchitch'un s'douoillait les mains d'peintuthe en ouvrant ou freunmant eune porte. Sans doute, ch'tait où'est qu'peintres et tchèrpentchièrs 'taient en travas qué ch'la s'arrivait.
I' n'faut pon s'înmaginner tch'i' pâssait tout san temps à jouer des farces, nouot' Fraînque. Il 'tait un raide bouan travailleux li-même, et bein aufait et consciencieux. Il avait un sens d'humour èrmèrquabl'ye et 'tait bein génétheux. Comment tch'i' mênageait à jouer ses farces sans êt' veu est tchiquechose qué j'n'ai janmais peu comprendre.
Si s'n esprit est parmi l's anges au Paradis, comme i' l'méthite bein, i' f'thont mus dé n'laissi pon lus harpes par les c'mins entre les louanges, ou bein i' trouvethont un manque dé harmonie quand faudra les faithe sèrvi, viyant qu'la tension des cordes a 'té changie sans qu' pèrsonne s'en appèrchûsse! Chutte fais, i' m'sembl'ye l'vaie ritonner à san tout seu là-haut, l'Fraînque!
Viyiz étout: