Les Pages Jèrriaises

Ch'est aîsi d'crititchi

Trenton, Michigan, USA.

Lé 8 dé mai, 1982

Moussieu I'Rédacteu,

Chein tchi m'a frappé en ouvrant la gâzette du vîngt-deux d'avri, tchi veint d'arriver, est d'vaie l'întitulement d'eune articl'ye disant qué les critiques entouôrre la vie dans l'Île sont vâliabl'yes. Bon, j'pensis en mémême, des critiques? Et mé tchi criyais qu' Jèrri 'tait un vrai paradis! Tch'est tch'est si enn'yé d'sa vie en Jèrri tch'i' trouve tch'il est nécessaithe dé la crititchi? Est-che tch'il est à créver la faim? Et sans travas? Nannîn, sans doute, car ches jours y'a tréjous l's autorités et la municipalité à porter s'cours, et l'auteur dé l'articl'ye pathaît aver eune vocâtion tch'est bein payie.

Est-che tch'il est malade? Nannîn, car l'Hôpita né r'fûse pèrsonne qué l'docteu ou l'ambulance lî présentent. Estche qué sa bouannefemme est picangn'rêsse et qu' ch'est împossibl'ye dé vivre auve lyi? Nannîn, car ch'est aîsi d'obtenîn l'divorce à ch't heu. Est-che tch'il a ma ès dents? Nannîn, car i' peut en acater un neu chipé siez l'dentiste. Est-i' en dispute auve san vaîsîn au sujet du r'lié l'long d'san fossé et tch'i' crait qu' v'là tchi couôte trop d' aller en Cour? P't-êt' bein, mais i' y'a tant dé nouvieaux Avocats dans La Rue ès Trais Pigeons et L'Vièr Marchi tch'i' peut probabliément en trouver iun d'ches nouvieaux assèrmentés à pliaidgi sa cause dévant la Cour Rouoyale à bouan marchi.

V'là tchi m'ramémouaithe qué quand j'tais janne l's Avocats c'menchaient à pliaidgi dans la p'tite Cour pour pratitchi. Dans chu temps-là ch'tait pûtôt nécessaithe. Moussieu l'Bailli William Henry Venables Vernon présidait sus l'siège dé la Cour Rouoyale auve la dingnité dé s'n office dé Chef du Baillage et lé r'gard sévéthe dé san rang. Les jannes Avocats (i' n'y'en avait pon tant dans chu temps-là) en avaient peux et n'ôsaient pon faithe dé trompes dans lus plaidoyers.

Mais r'vénant au chein tchi critique la vie comme oulle est en Jèrri. Est-che tchi trouve tch'i' n'y'a pon assez d'lieux d'tchulte? Nannîn, car i' y'a tout pliein d'églyises et assez d'chapelles dans l'Île, et y'en a pour touos les goûts. Est-che tch'i' n'y trouve pon assez d'aubèrges? Nannîn, car i' y'en a bein trop. Est-che tch'i' n'y'a pon assez d'motos? Nannîn, i' y'en a à gogo. Est-che tch'i' n'y'a pon assez d'jannes filles à mathier? Ch'là, j'n'y connais pon grand' chose. J'ai tréjous ieu peux des femmes et v'là tch'i' m' a fait rester veuvi pour souoxante-trais ans! Tch'est qu' ch'est, don, tch'i' y'a à crititchi tellement dans la vie d'Jèrri? Eune chose tchi m'frappe est que les noms des cheins tchi critiquent né sont pon des noms Jèrriais. Et quand j'vais en Jèrri et qué j'visite mes vièrs anmîns, des vièrs Jèrriais d'race comme mé-même, jé n'ouai janmais d'pliaintes au sujet d'la vie d'jour en jour dans l'Île.

Les cheins tchi sé d'mentent tréjous d'changi la manniéthe dé vivre sont, en général, v'nus d'aut' pays y d'meuther. V'là tchi m'donne à craithe, dépis tch'i' s'y sont etablyis, tch'il' ont trouvé la vie satisfaîsante assez. Autrément, nou créthait tch'i' voudraient lus en r'aller dé où'est tch'i' sont v'nus et tch'est bein mus gouvèrné qu'en Jèrri.

V'là tchi m'fait penser à la sîmplyicité d'la vie en Jèrri y'a huiptante et pus d'années. Eune séthée, assis au pid du feu auprès l'thée, Papa nouos dît qué tel et tel, tch'était v'nu à la forge pour aver san j'va féthé à matîn, 'tait enn'yé d'fèrmer et voulait vendre sa fèrme et s'en aller travailli pour les Robîns à La Côte.

"Combein vyi tch'i' faut être dévant pouver faithe comme nou veurt tout l'temps et touos les jours dé sa vie?", jé d'mandis à Papa.

"N'en v'là ieune qué jé n'peux pon rêpondre," i' m'dît. "pèrsonne n'a pon 'couo vêtchu assez

longtemps pour saver! Mais lé pouver d'faithe tout à san gré touos les jours de la vie n'apportéthait pon l'bonheur. Un homme en veindrait enn'yé, prîncipalement s'il 'tait riche et tch'i' n'eûsse pon bésoin d'travailli.

"Lé travas, quand i' n'est pon accâbliant, est iun des grands bonheurs dé la vie. Né v-'là cèrtainement chein qu' la Sainte Églyise avait dans l'idée quand ou nouos dît dans l'Caticème (tu l'trouv'thas au bas d'la page 174 dé La Litourgie) tch'i' faut 'Chercher les moyens de gagner ma vie honnêtement et de faire mon devoir dans l'état oû il plaira à dieu de m'appeler.' "

George d'La Forge

 

Viyiz étout:

 

Les Pages Jèrriaises