Fort Lauderdale, Florida.
U.S.A.
Moussieu l'Rédacteu,
Où'est tch'est l'temps qu'les filles appranaient des vocations? J'vouos dîsais l'aut' sémaine qué quand j'tais mousse un garçon tchittait l'êcole à treize ans et allait en travas ou appranait eune vocation à mains tch'i' fûsse fis d'moussieu ou d'riches pathents. Eh bein, ch'tait d'mème pour les filles étout.
S'i' s'adonnait qu'eune fille dé grand' fanmile 'tait la grande des êfants nés dans chutte fanmile-là, y'avait des chances qu'ou restîsse siez-lyi auprès s'n êcollage pour aîdgi à sa m'mèe à souangne ses pus p'tits fréthes et soeurs. Oulle appranait à faithe lé mênage en mème temps, et y'a ieu bein des cas où'est qu'eune fille dé quatorze ou tchînze ans avait rempliaichi eune méthe décédée, et êlevé eune fanmile dé fréthes et soeurs en souangnant d'san p'pèe et d'un mênage! I' n'faut pon oublier tch'i' y'avait d'grand' fanmiles y'a septante et huiptante ans, et qu'les garçons et filles n'étaient pon piplottés comme i' sont à ch't heu. Dans des cas où'est qu'les pathents 'taient pauvres, et tch'i' n'avaient pon les mouoyens d'maint'nîn lus filles à rein n'faithe quand i' tchittaient l'êcole, il' allaient en sèrvice siez les mêssieux ou gens d'bein, et v'là tchi n'tait pon considéthé honteux. Quand eune fille en sèrvice dé mème sé comportait comme i' faut et travaillait bein, oulle 'tait souvent traitée comme membre d'la fanmile - et pon comme eune sèrvante.
Si la fanmile pouvait y'affaurder, les filles appranaient eune vocation. Y'en avait deux tch'étaient populaithes - la couôtuthe et l'féthage. Y'avait eune Missis Maugi tch'avait eune couôtuth'thie dans la Route des Palliéthes, pas bein liain du Carrefour à Saulx. I' m'sembl'ye qu'la maîson a nom L'Hôtel du Pits à ch't heu. Ch'tait-là qu'les filles allaient apprandre à couôtre quand j'tais mousse, et y'en avait tréjous eune démié-douzaine ou pus là en mème temps. Ma tante et mârraine (la soeu d'man p'pèe) en 'tait ieune, et oulle 'tait eune fanmeuse couotuthiéthe, mème dans ses vièrs jours. Ou' mouothit en 1957 à l'âge dé 91, et ouaithe qué sa veue 'tait faillie ou' pouvait acouo enfiler eune adgulle à ch't âge-là - auve l'aîgue dé ses leunettes, sans doute - et sa couotuthe 'tait si parfaite qué nou-s éthait quâsi pensé qu'oulle éthait 'té faite à la machinne. Eune chose tch'i' m'vient à l'idée est qué toute sa vie dépis qu'oulle avait apprîns sa vocation, ou' jugeait les filles tch'avaient apprîns à couôtre auve lyi par lus aget dans la couôtuthe! Combein d'fais qu'ou' m'a dit: "Chette-là? Janmais ou' n'éthait deu êprouver à couôtre! Ou' n'put mème janmais apprandre à faithe lé point d'pid-d'ouaîthé comme i' faut! Mais ta souôsinne Hilda - Ah! Tu pâles d'eune bouanne couotuthiéthe! Oulle avait d'l'aget, chette-là!"
Les filles 'taient apprenties pour trais ans à la couôtuthe. I' payaient dgiex ch'lîns en entrant, et dgiex ch'lîns en sortant à la fîn d'lus apprentissage. Et pis, au but d'lus temps, i' fallait rester à couôtre autant d'jours comme il' avaient mantchi dans lus trais ans. Il' appelaient ch'là "Faithe lus fautes!"
I' pathaît, étout, qu'les couôtuth'thies 'taient r'nommées comme académies d'caqu'téthie! Ch'tait bein comprannabl'ye quand nou pense qu'un tas d'jannes filles lus trouvaient enfreunmées ensembl'yes dans eune couôtuth'thie à londgieu d'jours! J'soulais faithe ma pouorre vielle tante et mârraine mârri en lî dîsant qu'j'avais ouï qu'Missis Maugi avait 'té forchie d'bouogi san poulailli dé d'dans l'bel, et lé r'pliaichi au Carrefour à Saulx, viyant qu'les poules né pouvaient pon s'entr'ouï caqu'ter quand la f'nêtres d'la couôtuth'thie 'tait ouvèrte, et tch'i' tchittaient à pondre dé mârrisson!
Quand la janne couôtuthiéthe avait finni d'apprandre sa vocation, ou' sé m'ttait sus san compte ou bein oulle allait couôtre à san jour par les maîsons. Ma mârraine y'allait, couôtre à san jour. Si j'm'en r'souveins bein, i' m'sembl'ye qu'ou' m'dîsait, dans san vivant, qu'ou' gangnait un ch'lîn par jour quand ou' tchittit pour sé mathier, et qué ch'tait les touos pus hauts gages pour eune couôtuthiéthe dans ches temps-là!
Y'avait d's hommes tch'étaient couôtuthièrs étout. Un couôtuthyi faisait d's habits à m'suthe pour hommes et femmes, et l's hommes tchi pouvaient y'affaurder avaient lus fa du Dînmanche fait à la m'suthe. J'pense tch'il' 'taient en ville, les couôtuthièrs. du mains, j'n'en ai janmais connu à la campangne. Des filles dé vocation 'taient empliyées à faithe la couôtuthe, et deux d'mes couôsinnes, filles dé m'n oncl'ye Ph'lippe, avaient apprîns lus vocation à faithe des habits d'mème. Ieune, ma couôsinne Hilda, décédée dreinement à l'âge dé 85, travaillait pour la Maîson Bisson, où'est qu'la boutique Woolworth est à ch't heu, et oulle 'tait maitrêsse-couôtuthiéthe dans la couotuth'thie ès Mêssieux Colley et Fils quand ou' tchittit pour sé mathier.
J'voulais vouos pâler d'la vocation d'féth'rêsse étout, mais j'n'ai pus d'run - ché s'sa pour eune aut' fais!
George d'La Forge
Viyiz étout: