Les Pages Jèrriaises

La Ville et les boutiques

Djais-sept dans deux chambres

à Portînfé, Saint Ou,
Vendredi au sé.
Moussieu l'Editeu,

J'ai 'té bein content à matîn de r'chever la lettre tchi suit:-

"Chier Ph'lip. J'voudrais prendre chutte opportunité pour vos dithe que j'trouve votre lettre tch'appathait chaque s'maine dans la gâzette diversement întérressante. Mais la sienne publiée lundi au sé nos donne l'impression que d'vant longtemps toutes les boutiques en Ville s'en vont rester freunmées le samedi l'arlévée.

"J'veur certainment vos rasseuther et touos nos bouons campagnards que la Chambre d'Commerce, à une réunion du Conseil tch'eut lieu tout drainement, et tchi fut donnée un rapport tout à fait dêtâillyi dans la gâzette, se dêcliathit sans autchune hésitâtion contre l'idée de freunmer les boutiques le samedi l'arléevée et j'sommes convaintchus que la majorité des boutitchèrs en Ville sont d'la même opinion comme nou étou, et sont compliètement en faveur d'nos r'commendations.

"Ch'est pourtchi, Moussie, j'vos d'mande d'aver la bonté de rasseuther touos vos lecteurs sûs chu point dans votre préchaine lettre.

"Bein sincéthement,

(signé) J. Stanley Marie,
Président."

"I'm semblye," dit la Merrienne, en pâslant hier au sé, "que j'avons dans l'Ile, au jour d'agniet, hardi d'caractèthes tchi n'li font pas grand crédit. Sans compter les causes d'vant les Assises, tchèsqu-tu crais d'la dêcouverte en Ville de djais-sept à couochi dans les deux chambres en Pier Road?"

"Je n'voudrais pas dithe tchèsque j'en crais," j'li dis, "sinon tch'i' sont chanceux que l'temps n'est pas pûs caud."

"Et tchèsque tu veur dithe par chonna?"

"Et bein, ma vielle," j'raiponnis, "caltchule chonna pour té-mêmes. Dans les djais-sept, n'oublie pas que n'y avait que chinq hardelles, toutes souos l'âge de vingt-quatre ans ou d'même. V'là tchi laissait une doûzaine de garçons, et à ma veue ch'tait hardi."

"Vèthe, sans doute," ou s'accordit, "mais au mains y'avait deux chambres."

"Vèthe," j'dis, "mais y'avait, accordant à la police, un mêlange; ch'est à dithe ch'n'tait pas une tchestchion de touos les garçons dans une chambre et toutes les hardelles dans l'autre. Châtchun et châtchune chouâisissaient lûs liet. Ch'est comme tu dis, ma Merrienne, j'avons ichin à ch'teu' bein des caractèthes tchi n'font pas grand crédit à l'Ile."

"Epis l'temps?" ou dit. "Aut'fais nou-s-avait tout plien d'solé en êté, et les visiteurs n'taient pas desappointés, bein souvent pour trais mais d'temps, mais a ch'teu' l'solé a prèsque dispathu et ch'est d'la mouolliêtuthe partout. Dans les clios le fain à des bords a pouôrri, et les tomates ont la maladie. I' n'y a que les brécolis tchi flieuthissent."

"I' sont comme l'Greffyi d'la P'tite Cour," je m'fis, "tch'a appathu dans un neu suit d'habits."

"Ch'tait la 'Post' tchi li avait donné un avis tch'il 'tait grand temps," ou dit, "et y'a d'autres mêssieux d'la Cour tchi mettent lûs bouons habits seulement au dînmanche quand i' vont à l'églyise ou à la chapelle."

"Pâslant de chonna," je r'mertchis, "nou-s-entend qu'à Saint Louothains i' n'y a pas tout à fait autant de bancs vièdes comme i' y'avait."

"I' faut que j'en pâsle à Ernest Lé Cornu," ou dit. "Comme Député et un homme important dans l's Etats, ch'est s li d'montrer un bouon exemplye."

"Quant à chonna," j'li dis, "j'n'ai jamais veu que les gens tchi vont au tchulte sont miyeurs que d'autres. R'garde ton oncl'ye, Isaac, tchi n'mantchait jamais un service, même sûs la s'maine, mais tch'avait au mains une femme dans châque vîngtaine d'sa pâraisse et tchi 'tait bein r'connu comme un fièr fripon. Touos les services du monde n'éthaient pas fait d'bein à chu pend'loque-là."

"Y'en a de toutes les sortes dans chu monde," ou dit, "et si l'bouonhomme 'tait un hypocrite, y'en avait d'autres. Mais à ch'teu', Ph'lip, Tchèsque-tu dis d'une tâsse de café d'vant ramonter à nos couochi?"

"J'pouorrais penser sans autchune diffitchulté à tchiquechose miyeu que du café," j'li dis.

"Pense aussi longtemps comme tu voudras," ou dit, "mais ch'est du café ou un vêrre d'ieau."

Et don, Moussieu, j'fus m'couochi sûs une tâsse de café, et je n'dormis pas d'niet.

Ph'lip

 

Viyiz étout:

 

Les Pages Jèrriaises