Fallbrook,
Lé 21 dé mai, 1983.
California, USA.
J'ai ouï qué y'a des changements à la maison d'La Fontaine à Millais, St Ouën, où'est qu'Missis Eunice Mills gardait boutique ches dreines années. J'ai connu chutte maison toute ma vie. J'mé r'souveins du Sieur John Le Feuvre (fréthe du Juge Francis Vibert Le Feuvre, dé mémouaithe respectée,) et d'sa danme, Dlle. Helena Sara Le Feuvre, tch'en 'taient propriêtaithes quand j'tais mousse.
Ch'tait là qu' Manman faisait sa boutiqu'sie, et j'y'allais tréjous auve lyi. Si j'ai la chance d'aller en Jèrri ch't êté ch'est seux qué v'là tchi m'pathaîtra drôle dé vaie ches changements, et j'mé d'mande si y'étha eune boutique là.
 L'églyise dé St. George
|
Ieune des dreines fais qu' j'allînmes à la boutique de La Fontaine, Manman L'Feuvre et mé, quand j'tais mousse et d'vant m'en aller d'meuther siez ma marraine à St Brélade, j'rencontrînmes la bouannefemme Betté Lé Sbithé.
"Bon!" ou s'fît, "ch'n'est pon souvent qué nou s'rencontre dépis qu' j'ai tchitté l'Églyise dé St George pour aller à la Chapelle,"
"Nan dgia!", Manman lî dît, "J'en ai r'gret, et i' vouos ont mantchie dans l'chant car i' y'a tréjous un manque dé pèrsonnes tchi chantent la s'gonde, et ou-s-avez eune bouanne vouaix. Si jé n'sis pon trop tchuthieuse, tch'est tch'i' vouos a fait changi d'tchulte? Moussieu pépin ou Moussieu Barascud vouos ont-i' offensée?"
"Nannin dgia!", ou nouos dit. "Ch'est assez drôle qu'ou-s-avez mentionneé l'chant. I' s'adonnit qu'un Dînmanche dans l'mais d'avri j'ouïs qué l'Prédicateu avait annoncé qué Jean Perrée et Jean Burlot s'en allaient chanter un chant à deux dans la Chapelle lé préchain Dinmanche. Comme ou l'savez bein, ches deux-là ont d'mangnifiques vouaix, Jean Perrée la bâsse et Jean Burlot la s'gonde, et ch'est supèrbe dé les ouï. J'mé décidis d'y aller chu Dînmanche-là. Auprès l'sèrvice, lé prédicateu châtchit d'main auve mé et i' m'dît qué ch'tait un grand honneu pour la Chapelle dé m'vaie là. Et pis i' mé d'mandit pouortchi qu' j'n'y allais pon pus souvent, et sans penser pus liain qué l'but d'man nez j'tais à lî promett' d'y r'aller l'préchain Dînmanche!"
"Et vouos'y pliais'-ous?", Manman lî dît.
"Eh bein," ou nouos dît, "j'n'ai pon 'couo peu m'décider si ouï ou non. À c'menchi j'aimais bein lus cantiques, et lus chant est nombreux et supèrbe. Il' ont bein pus d'chanteurs qu' à St George. Mais j'ai d'la peine à m'garder rêvilyie duthant lus longs sèrmons. J'criyais qu' Moussieu Barascud 'tait long, mais ses sèrmons sont courts en compathaîson. Et pis i'faut qu' j'admett' qué j'manque les psaumes et les belles prièthes, et la Litanie, dans tchi qu' tout l'monde prend part dans les sèrvices à l'églyise."
"Eh bein," Manman lî dît, "quand i' l'faut, nou s'accouôteunme a tout. Mais ou savez bein qu' vouot' pliaiche dans l'chant a St George est tréjous là à vouos attendre. Et j'mé d'mande tchiquefais pourtchi qu' touos les Chrêtchiens ont bésoin d'organniser tant d'difféthents tchultes. Y'a, par exempl'ye, les Mormons. Ieune dé mes tantes en fut si împressionnée qu' ou les joingnit et s'en fut auve ieux à La Nouvelle Zélande."
"J'ai ouï," nouos dît Missis Lé Sbithé, "qué dans chutte réligion-là l's hommes peuvent mathier pus qu'eune femme. Jé n 'sai si ch'est vrai?"
"Pas à ch't heu," Manman lî dît. "I' c'menchidrent dé même en Améthique, mais ch'tait contre la louai dans chu pays-là et l's hommes eûdrent à abandonner chutte couôteunme et lus contenter d'eune femme. Mais i' faut qué j'm'en âge pour graie l'thée. Ch'est à la préchaine, et mes complyîments à vouot' bouanhomme."
Viyiz étout: