Trenton,
Michigan, USA.
Lé 4 dé juilet, 1981.
Moussieu l'Rédacteu,
Un anmîn Améthique m'disait l'aut' jour qu'à s'n idée les gens tch' appartcheinnent au secte réligieux des Témoins d'Jéhovah sont superstitieux.
“Bon!”, j'lî dis, “tch'est tch'i' t'fait craithe d'ité?”
“Eh bein,” i' m'dît, “t'en vas-tu m'dithe qué tu crai tout chi niolîn-là tch'il' êprouvent à nouos dithe toutes les fais tch'i' veinnent taper à la porte?”
“Mais”, j'lî dîs, “ch'n'est cèrtainement pon du niolîn. Ch'est lu întèrprétâtion des pâssages dans les Saintes Êcrituthes, et ch'est preuve tch'il' ont êtudié la Bibl'ye parfondement. Quand même qué nou n'est p't-êt pon tréjous du même avis comme ieux au sujet dé telle întèrprétâtion, nou dév'thait admither lus dêvouement à lus crianches rèligieuses.
V'là tchi nous f'thait du bein d'liéthe la Bibl'ye aussi souvent comme ieux, et d'aver nouot' întèrprétâtion à compather à la leu quand i' veinnent nouos vaie. À la pliaiche d'êt' enn'yés d'les vaie, ché s'sait întérêssant dé distchuter auve ieux amicalement et auve un espirit Chrêtchein pour lé bénéfice dé tous. À m'n idée, il est grand temps d'faithe tchiquechose dé même, et d'èrvénîn à la vie pus trantchil'ye et Chrêtcheinne d'aut' fais pour combattre la mauvaîtchi et manque dé respé pour lé moral et la louai d'nouos jours.”
“Tch'est tchi t'fait craithe qué la vie du temps pâssé 'tait miyeuthe qué la cheinne d'à ch't heu?” mén anmîn m'dît.
“Eh bein,” j'lî dîs, “ch'n'est pon eune affaithe dé crianche pour mé. J'l'ai vêtchue, chutte vie d'aut' fais, ch'est en tchi ch'est auve expéthienche pèrsonnelle qué j'en pâle.”
“Mais,” i' m'dît, “j'criyais qu' t'avais à marchi entre deux et trais milles dé châque côté pour aller et r'vénîn d'l'êcole touos les jours. Appeles-tu chenn'na êt' miyeu qu'à ch't heu qu' tu pouôrrais y'aller par beusse ou y'êt' porté en moto par tes gens? Et tu nouos as dit qu' tu marchais chîn milles auve tan Papa et ta Maman pour aller visiter tes Parrain et Marraine à La Mouaie à St. Brélade. Et qu' tan Papa marchait des Landes à l'aut' but d'La Route des Mielles touos les jours quand i' trempait l's ôtis des cârrieurs dans la p'tite forge tch'était dans la cârriethe dé La Pulente quand il' 'taient à faithe lé neu mont là. Et combein d'fais qu' tu nouos as dit qu' les fèrmièrs du vièr temps travaillaient à londgieu d'jour dans les clios et pâssaient lus nyits au vrai dans les grèves à L'Êta? Appelles-tu toute chutte mînséthe-là eune miyeu vie qu' la cheinne d'à ch't heu?”
“Eh bein,” j'lî dîs, “ch'est bein vrai, tout chenn'na. Et j'n'ai janmais mantchi dé lé r'dithe des fais sans nombre quand j'vai la pièrcheuseté des gens et des jannes d'à ch't heu tch'ont peux d'marchi dgiex pas sans aver à êt' portés ichîn et là en moto, et tch'i' craient qué la pâraisse ou L's Êtats lus dait subsistance sans travailli pour.
Nouos anciens, auve toute lus duthe vie, mênageaient à mett' deux-s'trais sou d'côté toutes les s'maines pour prendre soin d'la maladie et d'la vieilléche. Et il' 'taient pus heutheurs qué les gens d'à ch't heu. La chose à considéther est qué nouos anciens n'considéthaient pon qué l'travas 'tait eune mînséthe. Il' 'taient endueurchis, et il' avaient apprîns à êt' contents d'gângni lus pain par la sueu d'lus fronts. I' r'gardaient chenn'na comme étant l'êtat d'la vie d'touos les jours. I' n'avaient pon la gêne et la responsabilité d'aver à gângni assez pour payi pour toutes les âtivelles d'au jour d'aniet, comme, par exempl'ye, “réfrigerant”, “télévision”, fou et aut' choses tchi marchent à l'êlectricité dans les tchuîsinnes, ichîn en Améthique, homme et femme du ménage sont forchis d'travailli touos les deux pour subithe au couôtement des bésoins d'la vie. Et tch'est tch'i' trouvent en rentrant au sé? Fache dé bouais, eune maîson viéde si les mousses sont grands assez pour êt' à j'va sus des motocyclettes, ou à faithe mêché dans l'vaîsinné.
Au mains, l'homme dé la maîson dans l'vièr temps gângnait la vie d'sa fanmil'ye et pouvait s'attendre à trouver un r'pas sus la tabl'ye à l'attendre quand i' rentrait siez li à la fin d'san jour dé travas, et sa femme et ses mousses a lî faithe la beinv'nue. Et l'Papa et la Manman étout dans bein des cas. Ch'tait la vraie jouaie d'la vie en fanmil'ye.
Mais nou n'gângne rein d'êprouver à changi l'monde,” j'dîs à m'n amîn. “L'etre humain étant chein tch'il est, lé pauvre es'sa tréjous auve nous car nou n'peut pon enrichi un publyi. Et i' faut aver vêtchu eune nénantaine d'années pour pouver apprécier l'bonheu et la sîmplyicité d'la vie d'aut' fais.”
George d'La Forge
Viyiz étout: