Les bouais sont à danser, lé pommyi auve lé pîn,
Lé tchêne auve lé bouôlias: i' font d'la valséthie.
Souos la musique des pliantes, les sèrcl'yes baivent trop dé vîn
(Il ont 'té învitées par lé Paîsson d'Avri).

La Cour Ûropéenne dé Drouaits Humains a dit
Qu'touos les douze Sénateurs dév'thaient êt' rempliaichis
Par chîn patates Rouoyales, deux pithots, eune tchulyi,
Deux compiuteurs, eune pièrre, et lé Paîsson d'Avri.

Lé cheurque et la pihangne ach'teu sont amouotheurs
Et il' ont dêcidé qué, quand i' lus mathyient,
Touos les paîssons d'la mé dév'thont envier des flieurs.
Il' èrchév'thont du vrai d'siez lé Paîsson d'Avri.

Au mais d'Août les flieurs ont eune Batâle dé Pèrsonnes.
Les chars sont tout couvèrts dé têtes, dé bras, dé pids.
Auprès la grande parade, les juges înspectent et donnent
Lé Prix d'Honneu au char fait par l'Paîsson d'Avri.

N' y'a pon dans la tchuîsinne lé maindre morcé d'fronmage.
Jé m'en vais à la leune en trouver eune braichie.
J'prendrai dé l'oxygène pouor d'l'air duthant lé viage,
Et d'l'ieau dé mé étout pouor lé Paîsson d'Avri.

Les Connêtabl'yes ont dit tch'i' faut mangi les mauves,
Et don touos les Chent'nièrs lus en vont fricachi
Ches pouôrres ouaîsieaux-là dans eune ênorme câssetrole auve
Des tonmates, d's ouongnons et un mio d'Paîsson d'Avri.

Eune grande dgaîngue dé faîtchieaux volit en Dgèrnésy,
Et à l'Aéroport i' prîntent deux-trais taxis.
Il éthaient deu voler ieux-mêmes car ch'est mains chi:
Lus titchets 'taient vendus par lé Paîsson d'Avri.

Les vaques tchi sont dans l'clios ont bâti eune églyise.
Nou vait eune crouaix d'mèrgots sus l'haut du bieau cliochi.
La vaque-minnistre prêch'cha à seule fîn qu'i' construisent
Eune p'tite chapelle étout au saint Paîsson d'Avri.

Un magâsîn aniet contcheint un grand portrait
Chotchant dg'iun houmme fanmeux: un portrait du Bailli.
Il est dêshabilyi, allouongni sus un liet.
Des photos dans "Playgirl" par lé Paîsson d'Avri!