Le Ménage ès Feuvres,
St. Ouën.
Lé 20 d'août, 1977.
Moussieu l'Rédacteu,
Un vièr diton nouos dit qu' eune néthe brébis est blianche à sa méthe. Et eune arînmée d'nouôrriche qué nouos anciens r'citaient ès p'tchiots 'tait: Man péthe avait des brébiliettes, et lé loup vînt en mangi chîn' - et lé loup, loup, en mangit tout! Eune brébiliette voulant dithe, sans doute, eune pétite brébis. V'la tchi montre qué la brébis 'tait d'împortance assez dans la vie d's anciens pour en êt' lé sujet d'un diton.
J'vis eune lettre dans la gâzette ichîn en Jèrri y'a un an ou deux tch'avait 'té êcrite par un homme tchi disait tch'il avait ouï pâler d'brébis tch'avaient quat' cornes à la pliaiche dé deux, et tch'i' savait bein qué ch'tait des mannes' à fou qu' tchitch'un avait mînt par les c'mîns, car ch'tait riditchule dé penser tch'i' pouver y'aver d'ité en rêalité. Eh bein, ch'est absolûment vrai tch'i' y'en avait dans l'tout vièr temps.
Ch'tait eune sorte dé brébis tch'était sîndguliéthement Jèrriaise. En général, chutte sorte d'brébis-là avait six. J'ai un portrait dans la salle du Ménage tchi montre Lé Vièr Marchi en 1738 quand l'Général Jean Cavalier fut assèrmenté Lieut'nant-Gouverneux d'l'Île, tch'en montre un coupl'ye, et autcheune pèrsonne est la beinv'nue à v'nîn vaie l'portrait pour lyi-mème. L'existence dé chutte fanmil'ye dé brébis à quatre et siex cornes est mentionnée par lé Docteu Frank Le Maistre, OBE, dans l'bulletîn dé La Société Jersiaise dé 1975, et i' nouos dit tch'i' c'menchaient à s'péthînmer dêjà en l'année 1584. Ou pouvez don vaie qué j'sommes à pâler des brébis dé y'a beintôt quat' chents ans.
Les brébis 'taient nombreuses en Jèrri au Mouoyen Âge et jusqu'au c'menchement du dgiex-huitième siècl'ye, et i' y'avait un tas d'bèrgéthies dans l'Ile où'est tch'il' 'taient rassembliées pour les touôser et probabliément pour les mèrtchi pour èrconnaître à tchi tch'il' appartenaient s'i' s'trouvaient mêlées ou êdgithées dans clios ou pâtuthe. I' pathaît qu' la seule bèrgéthie tchi reste en Jèrri à ch't heu est la cheinne tch'est au bas du gardîn en d'vant du Ménage et tchi fut présentée à La Société Jersiaise y'a un coupl'ye d'années par Moussieu Percy L'Masuthi d'La Pointe.
En pâlant d'les mèrtchi, i' pathaît tch'i' y'avait trais chents troupieaux d'bèrcas (bèrcas est l'nom pour les brébis en général) dans la pâraisse dé St. Ouën. V'la tchi montre combein nécessaithe qué ch'tait qué châque brébis eûsse eune mèrque pour l'identifier. Ch'est bein seux tch'i' s'trouvaient êdgithées d'temps en temps car il' 'taient à banon, étant trop nombreuses pour êt' fitchies à la tèrrée comme nou faîsait les vaques dans l'temps.
La manniéthe dé les mèrtchi 'tait, à m'n idée, cruelle. Lé Docteu L'Maistre nouos dit, dans l'bulletîn d'La Société Jersiaise, qué les r'gistres des siex cueillettes dé St. Ouën, pour les années 1716, 1717 et 1718 montrent l'enregistrément des mèrques pour châque troupé appartenant à cèrtains propriêtaithes dans châque cueillette. N'en v'chîn d's exempl'yes: La mèrque pour lé bèrcas dé La Seigneurie de St. Ouën est d'coper les deux ouothelles hors la tête. Pour lé bèrcas à Moussieu Philippe d'Auvergne, ch'tait d'êbuter l'ouothelle drouaite et d'y faithe eune ôque en d'ssus et ieune en d'ssous, et un creux, et pis êbuter l'ouothelle gauche. Pour lé bèrcas d'Maît' Jean Le Vêconte, fis Jean, ch'tait dé fendre l'ouothelle drouaite jusqu'au mitan et pis haler la pièche dé s'ssous jusqu'au ras d'la tête. Pour lé bèrcas dé Thomas dé Caën, junr. fis Thomas, du Coin, ch'tait dé fendre l'ouothelle drouaite en trais et d'coper la gauche horte.
Né v'la les mèrques pour seulement quat' propriêtaithes dé troupieaux dans La P'tite Cueillette, ch'est en tchi, en les liêsant ou pouvez vouos donner eune idée des difféthentes mèrques nécessaithes pour identifier les trais chents troupieaux dans la pâraisse dé St. Ouën. Et y'en avait bein d'autres dans l's aut' pâraisses. J'pliains bein les pouôrre pétits angnieaux d'chu temps-là, tch'avaient à aver l's ouïes gavachies d'même.
Et pourtchi tant d'brébis? Eh bein, comme ou l'savez, ouvrer 'tait l'otchupâtion principale des habitants d'Jèrri dans ches temps-là, et pour ouvrer i' fallait d'la laine, et pour aver d'la laine i' fallait des brébis!
Hommes et femmes ouvraient à tare-larigot, et l'Dictionnaithe au Docteu L'Maistre nouos dit qué par ordre dé la Cour en date du 10 d'juîn 1615 Ph'lippe Picot fut d'fendu d'ouvrer en compangnie des filles pour êviter lé scandal, et qué s'i' continnuait à ouvrer i' fallait ouvrer dans sa maîson et sans femmes. Tchi peunnition!
George d'La Forge
Viyiz étout: