Les Pages Jèrriaises

Sus l'pavé

Y'en a tch'ont crititchi la Pâraisse dé St Hélyi à ches drein pouor aver travailli trop bein. Véthe, nos couochons n'veulent pon d'chours, mais nou veurt qu'les ouvrièrs pârouaîssiaux boucrannent et boûsîl'yent pustôt qué d'faithe d'lus mus.

Ch'est en tchi nou-s'a à r'dithe entouor l'èrpav'thie d'la Rue ès Français. Nou dit qu'la ruette a 'té r'pavée trop bein, qu'les pavés ont 'té pliaichis trop souongneusement et v'là tch'a avrôné l'caractéthe du c'mîn. Les chèrche-picangnes éthaient sans doute aimé mus garder l'vièr pavage et ses policemainnes dormants et clius en tathe et les trottouaithes par tchi les cheins à boutitchi n'ôsaient dgéthe craûler et jobelinner avaû sans ristchi à trébutchi à bouon'-tchu.

Assa, l'pavage en Ville a êtibotchi du hèrtchîn avaû l's années. D'vant qu'les rues fûssent tathées, la clyîncâl'lie des reues et chabots sus l'pavage en pièrre disteurbait tant d'Villais qu'nou d'mandait du pavage en bouais. L'bouais 'tait s'posé d'provotchi mains brit par les c'mîns. Mais nou crititchait chu travas étout. Si l'èrpav'thie en bouais fut bein faite, jé n'sai pon - mais y'avait des pliaintes qué l'travas prannait bein trop longtemps. Élie (l'auteu E. J. Luce, 1881-1918) êcrivit eune poésie "Chanson du R'nouvé" tchi compathit l'èrpav'thie en bouais auve les suffragettes et dit qué "Quand l'încriyabl'ye enfîn sé trouv'tha accomplyi, j'pouôrrons espéther d'vaie l'pavage en bouais finni".

Et l'pavage a joué un rôle dans les révolutions. Duthant l's êmeutes à Paris au mais d'Mai 1968, nou-s'avait dêfoui les vièrs pavés dé d'dans les rues pouor pitchi ès officièrs. Nou dêcouvrit aînchîn qu'lé pavage avait 'té pliaichi (mais ofûche pas si souongneusement qu'à St Hélyi) sus eune couoche dé sablion. Lé fanmeux slogan don fut né: "souos les pavés, la grève", v'là tchi veurt dithe sans doute qué, coumme nou trouve du sablion (natuthel) souos les c'mîns (faichonnés), s'nou ramâsse lé pitchîn (à seule fîn d'lé pitchi à la police) nou r'trouve la libèrté et l'laîsi tchi dévthaient êt' natuthels.

Ch't' année, nou-r'est à dêfoui l'pavage dé Paris, mais chutte fais ch'est la meunicipalité tchi fait des travaux (mais ofûche pas si souongneusement qu'à St Hélyi) à Montmartre, où'est qu'nou-s'est à êlaîsi les trottouaithes et bâti des c'mîns à bike. Nou-s'a décidé don d'rempliaichi les pavés d'couôteunme par d'la tathe modèrne - et l'monde trouvent à r'dithe.

Assa, nou picangne partout (mais ofûche pas si souongneusement qu'à St Hélyi!)
 

Viyiz étout:

 

Les Pages Jèrriaises