Y'en a tchi dithaient - assez cruellement - qu'lé Conseil pouor l'Entréprînse du Quartchi du Hâvre es'sait mus nommé l'Conseil des Entrépranneurs du Quartchi du Hâvre, mais n'împorte tchi qu'nou pense des bâtisses là-bas, j'avons d'bouans noms pouor les nouvelles rues.
Y'a la Rue de l'Êtau tch'a prîns san nom d'un rotchi tch'a 'té entèrré souos l'èrcliâmâtion. La Promenade des Maries, lyi étout, est nommée pouor trais rotchièrs - les Trais Maries - tch'ont gardé l'apprèche d'la cauchie.
La Sente de Benoist mèrque - pus ou mains - la pliaiche sus l'ancienne grève où'est qu'lé preunmié avion tchi vînt en Jèrri arrêtit en 1912. Ch'tait un hydravion piloté par un Français, Jean Benoist.
La Cache des Mélèches est nommée pouor lé fieu tchi couvre chutte partie d'la Ville, et la Rue de Carteret ramémouaithe Messire George dé Cart'ret, Bailli d'Jèrri, tchi d'fendait l'Châté Lîzabé assiégi duthant la Dgèrre Civile d'Angliétèrre.
Combein qu'i' y'a d'histouaithe dans les vièrs noms - et les nouvieaux étout - d'Saint Hélyi!
Geraint Jennings
Viyiz étout: