L'année passée j'm'décidi d'èrchèrchi l'originne de nos routes, nos fossés et l'brancage.
Dans l'seizième siècle, Jèrri 'tait eune ile de clios à l'ouvert et presque pas d'fossés. La population tait alentou dé tchinze mille et la pliûpart taient fèrmiers. Vers la fîn du siècle, les fermiers c'menchîtent à faithe des p'tites routes pour la circhulation dé hèrnais et bestiaux. La raison qué nos p'tites routes n'sont pas draites, est qu'lus direction fut determinée par les bouaix tchi 'taient bein êtablyis au temps qu'les routes fûtent faites.
Le propriétaithe 'tait responsablye pour tailli les fossés tchi bordaient ses clios et d's'asseûther qu'les routes taient accessibl'ye ès hèrnais, piètons et bestiaux. Eune inspection 'tait faite rédguliéthement par des inspecteux à ch'va, et ch'tait la le c'menchement d'la visite du brancage.
Dans l'entrétemps, la pliûpart des propriétaithes lus sont dèchergis d'lus responsabilités en mettant eune clause dans lus bailles tchi met le locataithe responsablye pour le brancage.
I'a pas tellement longtemps qu'en Jèrri, n'ou viyait les vaques fitchis dans les clios.
J'avais trèjous penser que ch'tait pour contrôler le patuthage, mais les r'cords montre que comme le brancage, l'originne veint du seizième siècle étout.
D'vant la construction des fossés, les fèrmièrs fitchaient lus vaques, et même les couochons et les brébis pour protégi les récoltes duthant la saison dé crututhe. Un coup les récoltes ramâssaient, les bestiaux allaient à banon jusqu'au 'rnouvé quand les clios 'taient rens'menchis.
Percy L'Masuthi
Viyiz étout: