Lé Pont dé Londres est à tchaie, mais l'pont du Quartchi du Hâvre s'en va-t-i' tchaie avant d'êt' bâti?
L'ex-grôsse tête Soviétique Nikita Khruchtchov explyitchit qu'un politicien est l'chein tchi promet d'bâti un pont où'est qu'i' n'y a pon d'riviéthe. Ch'est bein seu qué j'n'avons pon d'riviéthe à St. Hélyi, mais les gens éthont à crouaîsi la Route d'la Libéthâtion pouor aller au Quartchi du Hâvre. Comme tchi qu'i' lus en vont l'faithe? Par un pont? Par un pâssage à piêtons? Sus un zèbre? Nou n'sait pon acouo.
Temps pâssé, y'avait tout pliein d'russieaux tchi coulaient par la Ville, entre les maîsons et les mielles. Nou vait acouo les noms des rues tchi nos donnent un portrait d'la vie à chu temps-là quand nou 'tait oblyigi d'crouaîsi un canné en allant d'eune boutique à sa vaîsinne. Y'a Lé P'tit Dou, et La Plianque Billot où'est qu'les gens soulaient crouaîsi l'russé sus eune plianque, et pis les danmes soulaient aver à trousser lus cotillons à seule fîn d'crouaîsi La Rue Trousse Cotillon pouor aller à l'églyise Pârouaîssiale.
Les rues d'la Ville ont bein changi d'pis l'temps quand l'ieau coulait librément, mais nou-s'éthait dit qué St. Hélyi 'tait quâsiment la V'nise des Îles d'la Manche!
J'éthons-t-i' don un Pont ès Soupirs? P't-êt' bein un Pont ès Soupirs des contribuabl'yes? Ou chu pont du Quartchi du Hâvre s'en va-t-i' craûler coumme lé fanmeux pont du Millénaithe à Londres? La fîn du temps f'tha tout vaie.
Geraint Jennings
2003
Viyiz étout: