Y'a tchique temps dans eune clâsse du Jèrriais dans ieune d'nos êcoles primaithes, j'têmes à r'garder eune carte dé Jèrri auve les noms des pliaiches mèrtchis sus en Jèrriais.
Eune fil'ye pointit à la carte et objectit, “L'Êgypte n'est pon en Jèrri!”
“Si-fait!” qué j'lyi dis. “L'Êgypte est dans La Trinneté.”
Et ouaithe qu'i' n'y'ait pon d'chanmeaux par les c'mîns, j'avons assez d'mielles et y'a des “d'sèrts” dans toutes les pâraîsses excepté, i' pathaît, Saint Cliément.
I' faut explyitchi qu'en Jèrri un d'sèrt est d'la tèrre tch'a 'té d'sèrtée pouor l'agritchultuthe, et né v'là pouortchi qu'i' y'a tant d'clios tch'ont nom Lé D'sèrt. N'oubliez pon nitout qu'l'églyise pârouaîssiale dé St. Pièrre est “St. Pièrre dans lé D'sèrt”.
Dans les touos vièrs temps, y'avait eune Êgypte en Ville étout, car iun des vièrs noms d'la Grand'Rue 'tait la Rue d'Êgypte. Pouortchi? Nou n'sait pon exactément, mais y'a deux théories qu'nou-s'a proposé. Preunmiéthement, qu'chu but-là d'la Ville 'tait hardi sablionneux; ou deuxièmement, qu'i' y'avait des Juis tchi d'meuthaient là - les Juis étant mênommés d's Êgyptiens y'a des siècl'yes.
En tout cas, ch'est seux qu'j'avons eune Pyramide en Ville. Où'est qu'oulle est? Dans l'Vièr Marchi, car ch'est la statue du Rouai George II tch'a 'té connue souos chu nom d'pis mille sept chents chînquante-tch'ieune quand la statue fut jutchie sus des d'grés en forme dé pyramide. Chu piédestal fut rempliaichi, probabliément en mille huit chents dgiêx-neuf, mais l'nom continnuait à êt' fait sèrvi.
Assa, Jèrri est bein pus exotique qué nou-s'éthait creu!
Viyiz étout: