San Antonio, Texas
U.S.A.
Lé 25 dé mar, 1967.
Moussieu l'Rédacteu.
J'vouos disais - y'a tchinze jours - qué j'tions huit fréthes et sśurs au Canada et dans l's Êtats-Unis - touos deux pays dans l'Améthique du Nord. Ch'est seux qué quand vouos lecteurs liêsent chen'na i' daivent penser qué j'sommes assez pour f'ner des Feuvres en quantité dans l'nouvieau monde! Eh bein, la preunmié chose à considéther est l'mêli-mélange des races ichîn en Améthique. Ch'est vrai tch'i y'en a au Canada étout, du mèlange, mais pon autant comme dans l's Êtats-Unis.
Au Canada y'a tout pliein d'chance, au mains en d'houors dé la province dé Tcheubec, qué les jannes hommes dé souche Angliaîche ou Jèrriaise lus mathiêthont auve des filles dé la race Anglo-Saxonne, et i' n'y a pon mal dé Feuvres dans la province d'Ontario. Ma fréthe Sydney a deux fis tchi sont mathiés, et il' ont trais garçons entre les deux tchi pouorront garder l'nom des nôtres en allant à l'av'nîn. Et les Canadgiens-Français d'Tcheubec lus mathyissent en général auve les filles dé lus provînce et d'lus réligion. Mais ès Êtats-Unis ch'est un vraie mélange - lé melting pot en Angliais - et les mousses dé pathents d'toutes les races lus trouvent ensembl'yes à l'êcole. Ouaithe qué dans bein des cas les pathents aient gardé lus caractéristiques dé race îndividuelle, la langue, et la réligion du pays natal, les mousses apprannent l'Angliais bein vite à l'êcole, et ch'est r'mèrquabl'ye dé vaie combein vite tch'i' s'acclyimatissent et s'accouôteunment à la réalisation tch'i sont Améthitchains d'naissance, et tch'i pèrdent absolument l'identité d'race dé lus pathents.
Filles et garçons font souvent d's alliances à l'êcole tchi continuent longtemps auprès tch'il' ont tchitté l'êcole et v'la tchi même souvent au mathiage. Lé garçon, sans doute, peut continnuer l'nom d'fanmile, mais les filles lus trouvent tchiquesfais engaumées dans des fanmiles dé difféthentes races et d'réligion. Nouot' fanmile ichîn, tch'a produit pus d'filles qué garçons, n'a pon êcappé d'chu mélange-là. Quant ès garçons, man fréthe Frainque en a iun d'âge dé mathiage. Man fréthe Percy en a iun tch'est mathié, et il a un garçon. Autrément ch'est des filles. Lé fréthe Percy en a trais. Ieune est mathiée à un homme dé race Anglo-Saxonne et a d's êfants, et ouaithe qué l'nom d'fanmile est pèrdu dans san cas, l's êfants sont d'nouot' race et réligion. Quant ès deux autres ch'est eune aut' histouaithe. Ieune est mathiée à un garçon d'souche Allemande. Il' ont trais êfants. L'autre est mathiée à un docteu Juis et oulle a quatre fis tchi sont Juis. Lé pays natal dé lus anchêtres 'tait La Russie!
Lé pus janne dé ma généthation est un d'mié-fréthe, et i' n'porte pon nouot' nom d'fanmile. Il a eune démié-douzaine d'êfants. Ses filles ont mathié dans des fanmiles dé difféthentes races - ieune Polonaise. Man d'mié-fréthe a don dgiex p'tits êfants, pus ou mains, tchi sont d'difféthentes races et d'réligions mais tchi sont touos citouoyens Améthitchains d'naîssance et d'langue, et tchi n'éthont pon d'connaîssance ni fort dé caractéristiques dé race êtrangièthe (à l'exception Juive) a m'suthe tch'i' grandissent!
Ieune de mes soeurs mathyit un Irlandais, et ses deux êfants ont eune demié-douzaine d'êfants entre ieux - trais Canadgiens-Irlandais et trais Canadgiens-Français. Ou' pouvez d'vinner lus réligion! Irlandais et Français étant d'la même réligion, i' s'entr'mathyissent aîsement!
Mes p'tits-êfants fûdrent nés au Michigan et au Texas, et l'péthe est d'souche Allemande mais Améthitchaine dépis quatre ou chînq généthations. I' sont êtudiants dans l'Univérsité du Texas et s'content Améthitchains dans l'ame. N'en v'la-t-i' un mêli-mêlange! A cause dé l'êmigrâtion d'mes péthe et méthe dé Jerri au Canada en 1901, du sang Jèrriais coule dans les veines d'au mains eune souoxantaine d'Améthitchains aujourd'aniet. Ch'est quâsi incriyabl'ye - mais d'ches souoxante-la i' n'y en a qu'eune douzaine et d'mie pus ou mains et ch'est en contant les femmes dé mes fréthes, tchi portent l'nom d'fanmile Le Feuvre!
I' pathait qu'ch'est l'mêlange des races tch'a fait la forche des Êtats-Unis d'Améthique. I' faut penser qu'ch'est vrai, et ch'est întérêssant d'vaie qu'la population d'nouot' p'tit vièr Jèrri est en trains dé dév'nîn un mêlange dé races etout. Nou vait pus d'noms êtranges qué d'noms Jèrriais dans l's annonces dé mathiages et d'naîssances dans la gâzette châque sémaine. V'la tchi veurt dithe qué dans l'couothant du préchain siècl'ye i' y'étha eune nouvelle race dé Jèrriais dans l'île, mais ou' n'pouorra janmais aspither à la qualité des Jèrriais d'nouot' généthâtion viyant tch'i' n'séthont pon la langue Jèrriaise! Pour ieux, lé dictionnaithe et chef-d'śuvre dé Fraînque Le Maistre es'sa eune tchuthiôsité car i' n'pouorront pon l'liéthe, et i' n'éthont autcheune idée d'la valeu du trésor tch'il' éthont pèrdu, et i' n'éthont janmais apprînt nouos vièrs ditons - et en partitchulyi l'chein tchi nouos dit, si véthitabliément, que les mathiages et l's entèrrements dans les maîsons font des changements!
George d'La Forge
Viyiz étout: