Moussieu l'Rédacteu,
À la fîn des fîns! Né v'là tchiques années qué j'pathais riditchule à un tas d'monde viyant qué j'sis tréjous à dithe qué quarante milles à l'heuthe est bein trop vite dans la grand partie des p'tites routes en Jèrri. J'ai même 'té surprîns quand j'tais en Jèrri, qu'un tas d'gens qu'j'avais tréjous pensé êt' consèrvateurs, n'accordaient pon auve mé! Chutte fais, dgia, né v'là l'chef dé la police salariée tch'est dé m'n avis! Dans la gâzette du 16 dé mar, y'a eune articl'ye tchi donne lé nombre d'accidents mensuels. Pensez, bouannes gens - 133 accidents dans l'mais d'févri, et 36 pèrsonnes bliessées! Et dans l'hiver! Tch'est qu'ché s'sa dans l'êté quand l'Île est plieinne dé touristes à cachi dans les routes tch'i' n'connaissent pon?
Comme lé Sieur Axon nouos l'dit dans san rapport, un tas des siex chents milles dé routes en Jèrri sont des p'tites routes, et quarante milles à l'heuthe dédans est eune vitesse dangereuse, et i' nouos dit qu'les Connêtabl'yes, d'accord auve lé Conmité d'La D'fense, ont réduit la vitesse à vîngt milles dans certaines routes. Y'a longtemps qué j'sis à dithe qué v'la tchi dév'thait êt' fait, et v'la tchi m'donne satisfaction d'vaie qu'auprès tout jé n'tais pon si bête comme jé l'pathaissais.
I' faut accorder tout l'crédit tch'est deu au Député R. R. Jeune pour sén êffort à êprouver à pèrsuader l's Êtats à former un tribunal dé r'veue pour considéther les pliaintes des cheins assujettis à la décision d'un fonctionnaithe ou conmité tchelconque. Lé fait qué 22 membres d's Êtats 'taient en sa faveur montre tch'i' n'est pon tout seu à craithe qué ch'est nécessaithe d'aver un tribunal dé même. Ch'est vrai qu'eune pèrsonne peut faithe un appel à la Cour Rouoyale, mais ch'est, qu'v'la tchi couôte! Par lé temps qu'un îndividu a consulté un êcrivain, et qu'l'êcrivain a êcrit Longue consulatation avec vous au sujet, etc., etc., dans san journal, et Considération remise à demain deux-s'trais fais, et pis tch'i' décide tch'i' y'a p't êt' raison d'cause et êcrit dans san journal, Qu'après mure considération vous m'avez autorisé de retenir les services de l'Avocat Tel et Tel et qu'à la fîn du compte l'affaithe va en Cour auprès acouo pus d'consultations entre client êcrivain et avocat, y'a des frais à payi qu'un tas d'pouorres dgiâtres n'peuvent pon affaûrder, et v'la tchi d's'encouothage les gens d's'y touôilli!
Eune aut' chose tchi m'a fait pliaîsi est l'protêt du Sénateu J.J. L'Mèrquand contre l's actions du Parlément Angliais, en pâlant pour nous sans nouos consulter au sujet dès dêcrets d'l'Angliétèrre contre lé gouvèrnément actuel de Rhodésia. Et i' faut féliciter les Députés tch'avaient l'couothage dé lus dêcliather d'san côté. Vouos articl'yes d'fond, Moussieu l'Rédacteu, sont des modèles dé bouan sens su sujet du tribunal dé r'veue et du prîncipe constitutionnel!
L'Député Norman Lé Bro pathaît s'êt' atchitté bein raisonabliément dans l's Êtats d'en par ichîn, et i' faut admettre qué sa proposition d'nationaliser lé Jersey Motor Transport fut bein présentée. Lé fait tch'i' n'en gangnit pon est preuve tch'i' y'a acouo des consèrvateurs dans La Chambre, et tch'il est bein èrconnu qu'autcheun conmèrce ou sèrvice organisé par eune compangnie à responsabilité lînmitée, pour profit, marche bein mus qu'iun tch'est souos la gérance d'un Êtat ou gouvèrnément tchelconque, et qué v'la tchi n'paie pon d'nationaliser autcheune chose. V'la tch'a 'té prouvé maintes et maintes fais ichîn en Améthique at au Canada étout.
En liêsant les discours des membres d's Êtats au sujet , j'sis v'nu à penser qué l'idée du Député de Veulle dé St Cliément est la miyeuthe dé toutes - ch'est-à-dithe dé former eune Autorité d'Transport Publyi, tch'éthait l'drouait d'réglier l'service et san couôtage au publyi, et subventionner au bésouain. J'avons les mêmes diffitchultés dans bein des cas ichîn, et l'couôtage des sèrvices d'êlectricité, gaz, ieau, etc., est réglié par des autorités appelées Public Utilities Commissions V'la tchi r'veint à la même idée du Député du Veulle, et v'la tchi travâle bein et donne d'la confiance au publyi, viyant qué ch't autorité-là a l'drouait d'dêcliather et d'lînmiter lé pourchentage dé profit qu'la compangnie à responsabilité lînmitée assujettie à sa juridiction peut faithe.
L'portrait d'la cauchie auve le baté pilote, tch'est dans la gâzette du neuf d'mar, et dans tchi qu'nou vait les mâts des navithes à vailes, mé ramémouaithe qu'ou' pathaissait d'même dans l'mais d'avri, 1901, quand man p'pée et ma m'mée et mes fréthes Sydney et John Giffard tchittîdrent Jèrri dans l'Dawn, eune brick de 168 tonnieaux, pour aller pour les Robîns à Paspébia, à La Côte. J'allînmes en ville, Papa et Manman et man fréthe, Fraînque et mé, dans la vainne d'un vaîsîn, deux jours de siette, pour les vaie sorti d'la cauchie, mais l'vent contraithe empêchit l'navithe dé faithe vaile. Malheutheusement, jé n'tions pon là quand i' fit vaile lé traîsième jour, et j'eunmes à nouos contenter dé l'vaie passer La Corbiethe par la f'nêtre dé ieune des chambres à haut siez nous à La Forge! Janmais autcheun d'nous né r'vit man p'pée en vie car i' mouothit à La Côte, le résultat d'un accident à l'âge dé 38 ans.
George d'La Forge
1967
Viyiz étout: