Les Pages Jèrriaises

Les d'vis du Bouan'homme George

Le grand jour est passé! Mess Berty est v'nu baithe du thée. I' vint dans les trais heuthes. Ch'est tch'i' tait habilli, mes bouannes gens, - comme un moussieu! Des braies à rilles, un veste maniéthe de grîsatres, eune néthe câsaque, fîns souliers d'tchui verni, des jaunes gants et un bieau chapé d'feûtre. Sus les gu'villes du pid, il avait des maniéthes de mitons en gris, - d'la même couleu d'san veste - tchi boutonnaient au coté, auve eune pétite strappe souos les souliers. I' hallit san chapé et entrant dans la héche du gardîn, et nou-s éthait dit que ch'tait l'Président d'eune Compagnie d'Asseuthance tchi v'nait!

Mérayeu nouos l'fît à connaître. La prumié chose que j'm'apperchut 'tait tch'i' n'pâle pas l'Jèrriais, - la langue de nos anchêtres! Souky, comme d'habitude, 'tait belle comme eune flieur. J'nouos assiévîmes tous dans l'parleux, et d'vyier quatre heuthes, Souky nouos apportit eune tassée d'thée et un morcé d'gâche. J'lî d'mandit s'i' voulait v'nîn vaie les vaques, et i' n'osit pas mé r'fuser. Mais ou' s'éthiêtes deu vaie l'mauvais r'gard qué Mérayeu m'dounit!

J'avais prîns bouan soin de n'netti pas l's'êtablyes, et pour mé faithe seux qu'i' pilvâtchîsse partout parmi les vaques, j'lé m'nais par le bras! J'lé viyais d'la carre de m'n'yi, èrgarder ses souliers et êprouver à marchi ioù qu'l'êtablye tait propre, mais tchi chance qu'il avait auve mé à l'condithe?

J'avais amathé l'Pierrot, not grand tchian d'Terreneuve, dans l'êtablye ès ch'vaux, et quand jé l'mîns abannon, i' tait si content tch'i' sautait comme un fo, et i' mîns ses deux pattes dé d'vant sus l'bieau veste à Mess Berty pour lî faithe la fête et lî litchi la fache! L'pouorre dgiâtre ne savait pas ioù s'couler! J'avais d'la peine à m'enpêchi d'rithe, et j'lî dît qué ch'tait bouan sîgne que l'tchian pathaîssait l'aimer, car i' n'aime pas tout l'monde! En êprouvant à nettu san veste, Mess Berty, tchi ne r'gardait pas ioù marchi, mîns san pid sur un râté tch'i' 'tait mâté l'long d'la muthâlle les daits en haut, et l'manche lî baillit eune ouappe dans l'mûset! V'là tchi l'y'enfllyit l'nez et lî fît l'yi gauche plieuther, et dêrangit ses corles. tchi r'lisaient comme du verni. Enfîn, j'l'em'nit dans la boulanguethie pour netti ses souliers, mais j'viyais bein tch'i' n'aimait pas sali ses mains, et la brînge que j'lî baillit n'tait pas trop propre! Quand il eut fini d'brîngi ses souliers, ses mains taient quâsi aussi néthes comme ses souliers!

En r'entrant, Mérayeu nouos rencontrit à la porte, et ou' r'tchulit quant ou' lî vit les mains, et san bieau gris veste tatchi ioù qu'Pierrot avait r'posé ses pattes! Ou' me r'gardit drôlement - comme si ch'tait d'ma faute! - et lî montrit ioù laver ses mains.

Justément d'vant nouos assiéthe à tablye, Ph'lippe Fitchet vînt me d'mander tchi faithe pour eune vaque tch'i' s'était êcornée. Ph'lippe êcalit l's'yièrs quand i' vit Mess Berty, et quand i' chatchit d'main auve li, i' faillit d'l'yêgliami les daits! Ch'esn est iun, chu Ph'lippe-là! Ch'tait assez pour faithe rithe les cats quand i' d'mandit à Mess Berty dans tchi pâraisse qu'était sa ferme! La pouore Mérayeu avait a peine ieu la chance de lî pâler, à Mess Berty, et j'viyais bein qu'ou' n'tait pas contente de vaie Ph'lippe. A ma grand surprînse, dgia, Souky pathaîssait amûsée d'les vaie ensemblye. Ph'lippe tait a mâchi, comme d'habitude, et j'vit Mess Berty s'dêcarrer d'oprès l'graie quand Ph'lippe êcoppit d'dans deux'trais fais d'siette. Mais Ph'lippe vit bein qu'Mérayeu n'en pathaîssait pas contente, et i' dêhallit l'tchas de p'tun de d'dans sa bouoches et l'fliantchit dans l'feu!

Ch'tait rîsiblye, tout d'même, de l'ouï d'mander des tchestchions à Mess Berty: "Allous jamais au Show des Trais Pâraisses?" i' l'î d'mandit: "Et tch'est qu'ou' criyis d'la jument qu'Mess d'la Ferme a trotchi pour san vier bidet? Avious ouï qu'lé ch'va à Mess Duclios cliopînne dépis tch'i' fut féthé par un forgeux d'la ville la s'maine passée? votre p'pèe se r'connaît-i' à êllever des p'tits couochons?" Mess Berty n'savait pas tchi l'î rêpondre, et i' m'sembliyait qu'Souky en avait du fanne! Ch'tait Mérayeu tch'i' vînt à san s'cours. "Mais, tu sait, Ph'lippe," ou 'lî dît: "Mess Berty n'est pas fermyi!"

"Bon, Missis d'la Forge," Ph'lippe lî dît: "J'criyais p'têtre tch'i' tait v'nu vaie vos vaques, tchi sont r'nommées pour être les pus belles de l'île!"

Ph'lippe s'assiévit dans la tchaise oprés du feu, et comme i' tait temps d'baithe du thée, Mérayeu fut oblyigie d'l'înviter à mangi auve nous, et, sans complyiments, Ph'lippe s'assiévit à côté d'Souky, tch'i' s'trouvit entre les deux garçons! Tout l'temps que j'tions à mangi, Ph'lippe baillit tant d'sa becque à Mess Berty entouorre ses ch'vaux et nos vaques que l'pouorre dgiâtre n'eut pas même la chance de r'garder Souky d'la carre de s'n'yi!

J'viyais bein qu'Mérayeu éthait voulu l'vaie à jé n'sait pas ioù, - mais Souky n'en pathaîssait pas du tout dêrangi, - ou' m'fît même un clyin deux'trais fais quand Ph'lippe pâlait tant d'fermage que Mérayeu n'pouvait pas même y mettre un mot d'travers!

Ph'lippe restit auve nous toute la séthée et allit r'condithe Mess Berty à la Bus.

George d'La Forge
14/6/1947

 

Viyiz étout:

 

Les Pages Jèrriaises