Quand nous visite l'Angliéterre, nous a souvent l'opportunité dé visiter des vielles propriétés et lus gardîns. Bein dé ches propriétés sont ouvertes au publyi par les bouons soins du National Trust et, à ches drein, j'ai ieu l'opportunité dé visiter eune grand'maîson tch'est connue comme Edgecumbe House, en Cornouaille. Chutte maîson a eune grand'histouaithe, avâu bein des siècles, mais sav'ous qu' à St Ou, j'avons pus qué deux douzaines dé propriétés tch'appartchiennent au National Trust dé Jerri.
Malheutheusement, la seule maîson à St Ou, La Ronche, est louée et nous n'a pon l'opportunité dé la visiter bein souvent.
Mais, i'y'a bein d'autres pièches qué nous peut visiter et sé rejouit pouor rein, pa'ce qué ches propriétés sont à l'ouvèrt comme la Mathe au Seigneu, lé Nièr Pré à côté, lé Dolmen et Les Monts d'Grantez, La Grande Tchiébault, la P'tite Tchiébault, etc.
J'pense bein qué bein dé ches propriétés né sont pon connues par les St Ouënnais, ouaithe-tch'i s'aient sus nouotre pas d'porte.
Av'ous janmais visité lé Nièr Pré quand les orchides sont en flieurs au c'menchement d'l'été, ou Lé Clios du Seigneu et les Mielles Perrée au r'nouvé quand i'y'a un tas d'ouaîselîn par les c'mîns, et étout marchi ava Lé Val es Reux, à côté du Clios du Val ès Reux et vaie d'autres ouaîsieaux. Du Côti dé la Crane, en d'ssus dé La Grève dé Lé, nous peut s' assiéthe et profiter dé la veue et acouo d' autres sortes d'ouaîselîn - pûtôt des ouaisieaux d'mé, comme les mauves, les ticqu'lesses, les poffîns et bein d'autres comme des craclîns dans l'geon. Ieune des pus belles pièches dé l'île pouor aver eune bouonne veue, ch'est sus la tête des Monts, où'est qu' nous peut vaie toute la baie d'St Ouën dé la Corbiéthejusqu'à l'Êta, et bein sus, nous'a eune supèrbe veue du solé couochant lé sé, si nous y va sus l'tard. Eune autre pièche éyou qu'nou peut aver eune bouonne veue ch'est au Rondy du Pûlé; qué la mé s'sait rude ou calme, i' y' a tréjous tchiquechose à vaie, qué s'sait les batchieaux en mé ou les ouaîsieaux alentou.
Lé Trust a bein des dons sus Les Mielles, éyou qué nous peut vaie un tas dé pliantes sauvages et nous espéthe qué janmais i'n'y'étha pon dé dévelopement dans l's alentours et qué ches pliantes, espécialement les siennes les pus rares, s'ont preservées pouor bein longtemps. I'y'a acouo d'autres propriétés comme Les Vaux d'Carteret au Mont Matchi et La Cime des Côtis à la Grève dé Lé tchi sont bein paisibl'yes et hors dé la vaie, et tchi restéthont sauvages et naturels à tout jamais.
J'avons bein des pièches à St Ou tch'appartchiennent au Trust. Ch'est d'en profiter.
François Le Maistre
Lé Gris Ventre 2000
Viyiz étout: