Trenton, Michigan,
U.S.A.
Lé 8 dé mai, 1976.
Moussieu l'Rédacteu,
Un vièr diton nouos dit qué “Touos l's ièrs né vaient pon d'eune sorte!” Ch'est bein vrai, et étant têtu comme la grand' parties des vièrs Jèrriais, j'ai tchiquefais pensé qué j'tais tout seu d'ma sorte quand j'continnuais à êcrithe la mème turlutte entouôrre des choses tchi m'pathaîssent împortantes. Par exempl'ye, y'a longtemps qué j'dîsais dans mes lettres qué ch'tait honteux d'laîssi l'estatue d'la Reine Victoria sus la caûchie où'est qu' oulle 'tait assujettie à l'înjuthe des ouaîsieaux tch'en faîsaient un lieu d'aîsance. Eh bein, j'veins d'aver l'pliaîsi d'vaie san portrait dans la gâzette du onze dé mar en c'mîn pour sa nouvelle démeuthe. Et dans la cheinne du 25 dé mar, qué j'veins d'èrchéver, ou règne sus san nouvieau trône dans l'par tchi s'en va êt' honoré par san fanmeux nom, à côté d'la grand' route dêjà nommée Victoria dépis longtemps. Il a prîns longtemps ès autorités à lus en d'menter, et j'sis d'avis qué l'DéputéStanley Le Ruez a aidgi à en faithe cas par aver entanmé la tchestchion d'sa nouvelle démeuthe dans L's Êtats.
Un aut' sujet qu' j'ai continnué à mentionner dans mes lettres est la nécessité d'moli la vitesses des motos dans nouos p'tites rues en Jèrri. J'l'ai mème mentionné tant d'fais qué j'sis v'nu à penser qu' vouos lecteurs d'veindraient enn'yés d'liéthe man bargouêchîn. Eh bein, j'ai ieu l'pliaîsi d'liéthe, dans la gâzette du 8 dé janvyi, qué Moussieu Chris Bright, dans sa colonne du sanm'di, est dé m'n avis étout. Comme un tas d'monde liêsent sa colonne, étant en Angliais, i' sont bein pus aptes à prendre avis à chein tch'i' dit qu'à chein qu' j'êcris en Jèrriais. Et dans sa colonne du 15 dé janvyi i' nouos dit qué chein tchi pense es'sait eune bouanne manniéthe de s'dêfaithe des missionnaithes des Témoins d'Jehovah es'sait d'lus ouffri eune tassée d'thée et d'lus d'mander tant d'tchestchions tch'i' finnithaient par lus enn'yer et s'en aller. Sén idée r'sembl'ye hardi à la suggestion qué j'fis dans ma lettre du 13 dé mar, d'êtudier la Bibl'ye au point qu' nou veindrait à la connaître aussi bein ou mus qu' ieux, et qué dans tel cas ché s'sait aîsi d'lus montrer sus tch'il accompte qué nou n'peut s'accorder à lus întèrprétâtions des Saintes Êcrituthes.
En liêsant lé magâzin “Pilote” dé l'Églyise Anglicanne pour lé mais d'dézembre, 1975, j'ai ieu l'pliaîsi d'vaie qué Moussieu “Pinpoint” nouos dit qué la gâzette est en erreur dé pâler dé deux Douoyens en Jèrri, l'Douoyen Catholique et l'Douoyen Anglyican. Il est absolûment dé m'n avis. J'ai mentionné la mème chose pus d'eune fais dans mes lettres. I' n'y'a qu' un Douoyen d'Jèrri. Ch'est un prêtre Anglyican et san nom est Moussieu Goss. V'la tchi m'fait pliaîsi d'vaie qué jé n'sis pon tout seu d'ma sorte dans m's opinnions - ouaithe qué si j'y étais v'la tchi n'mé f'thait pon d'peux. Nou n'gângne rein dé s'exprînmer si nou-s-est d'accord auve tout l'monde. En pâssant, j'crai qué l' “Pilote” a amendé hardi. Il est dév'nu întérêssant, et il est enrichi par les êcrituthes du Vice-Douoyen Peter Manton et dé Moussieu “Pinpoint”, et, à ches drein, “Gabrielle” a contribué tchiques bouannes articl'yes étout. Sans ches'-là i' né s'sait pon fort ravigottant à liéthe.
Ché s'sa întérêssant d'vaie l'rêsultat des délibéthâtions dans L's Êtats en conmité au sujet du trafi d'motos dans la ville chu mais. J'tais êtonné d'vaie dans la gâzette du 25 dé mar qué l'plian tchi s'en va êt' présenté ès Membres est à tchiquechose près l'mème comme lé chein tchi couôtit trente-huit mille louis en 1974, et tchi y'a tchestchion d'creuser eune deuxième tonnelle souos L'Mont d'la Ville. Absolûment i' n'dait pon y'aver bésoin d'dêpenser tant d'sou pour rêsoudre chu problème-là! Et quant à la tchestchion d'creuser eune deuxième tonnelle - à m'n idée ch'est eune folie.
Les rues d'la ville sont trop êtraites pour des motos, ch'est entchi la chose la pus pratique à faithe est d'empêchi les motos d'entrer d'dans. V'là tchi f'thait tout l'monde tch'y travaillent laîssi l'moto à la maîson et aller en ville par le beusse. La compangnie des beusses en fournithait assez viyant qué v'la tchi lus paiethait dé l'faithe. V'la tchi couôt'tait mains au partitchulyi qué d'aver à acater un moto et l'maint'ni pour aller en travas. I' pouôrrait sans doute en faithe sèrvi iun pour sé promener au Dînmanche, et i' faudrait pèrmett' la cirtchulâtion lé long dé l'Esplanade et par la tonnelle pour aller dans l'ést de l'Île.
Et quant ès grand' laies barraques dé garages dêjà bâties dans la ville, i' pouôrraient êt' transformées en appartènements d'habitâtion et v'la tch'aîguethait à soulagi l'êcarcité dé louages!
George d'La Forge
Viyiz étout: