Un jour en mil neu chent septante-chînq, j'tais à vîsiter la Mênag'gie à La Trinn'té tchi 'tait pus p'tite quand j'tais janne et les gorilles et l's orang-utans d'meuthaient acouo dans les vielles cages, et y'avaient acouo les peccaries et les tapirs dans chu temps-là.
Chu jour-là, y'avait d'l'excitement, et un tas d'monde, et même un vièr grand caméra dé Channel Television - et chennechîn avant qu'j'eûssions la télévîsion en couleurs.
Y'avait iun des p'tits gorilles à jouer sus l'hèrbe d'vant la maîson ès mammiféthes auve un gardgien. Et y'avait étout un grand homme ès bliancs g'veurs tchi sembliait bein împortant. En êffet, ch'tait James Stewart tchi 'tait à la Mênag'gie pouor ouvri la nouvelle maîson ès mammiféthes. Mé, jé n'connaîssais pon James Stewart, mais mes pathents m'explyitchîtent qu'i' 'tait un acteur Améthitchain bein fanmeux.
D'pis chu temps-là j'ai connu des gens tch'ont joué dans des films et à la télévîsion, mais né v'là tchi fut ma preunmié rencontre auve eune êtaile dé Hollywood.
Viyiz étout: