San Antonio, Texas,
U.S.A.
Lé 27 dé mar, 1976.
Moussieu d'Rédacteu,
Dans ieune dé mes dreines lettres j'avais m'nichi d'êcrithe à Moussieu l'Député Stanley Le Ruez si l'estatue d'nouot' bouanne vielle Reine Victoria 'tait laîssie à l'înjuthe des mauves et pigeons sus la caûchie. Eh bein, à ma grand' jouaie, j'vai dans la gâzette du chînq dé févri qu' ou s'en va finalement êt' transportée à sa nouvelle démeuthe dans l'par à côté dé s'n av'nue. Comme Moussieu R. A. Hunt, l'Arpenteux d'la Ville, 'tait d'avis qué l'transport sé f'thait dans tchînze jours ch'est seux qu' j'éthai l'pliaîsi d'la vaie en pliaiche quand j'veindrai en Jèrri vèrs la fîn d'mai.
Dans la colonne dé la gâzette du 29 dé janvyi tchi nouos ramèmouaithe l's êvènements dé y'a septante-chînq ans, j'vai l'annonce dé san décès en 1901, de la Reine Victoria. J'm'en r'souveins tout à fait bein car j'tais dans ma dgiêxième année dans l'temps. Dans chu temps-là nou viyait san portrait dans l'parleux dé quâsi toutes les maîsons dans la campangne. Quand j'eûmes la nouvelle dé sa mort, j'mînmes les ridgieaux à maîntchi bas dans la maîson pour lé jour, comme sîngne dé deu, siez nous à La Forge.
J'ai eune toute pétite èrsouv'nance dé la célébrâtion d'san jubilé d'souoxante ans en ville, en 1897. Papa et Manman m'enmnîdrent auve ieux à St. Hélyi pour vaie les décôrations, et i' y'iut eune procêssion d'toutes sortes d'cârrosses décorees tchi pâssit tout l'long d'La Rue d'Drièthe. Papa m'dit qué ch'tait un carnaval, et v'la tchi m'împressionnit hardi. Ch'est seux tchi y'a acouo tchiques gens d'nouos jours comme, par exempl'ye, Moussieu Ph'lippe Syvret, tch'étaient là à l'occâsion. Il a eune mémouaithe formidabl'ye, lé Sieur Syvret, et i' peut sans doute en donner un bouan dêtail. N'ayant qu' siex ans dans l'temps jé n'm'en r'souveins pon fort, mais l'împression m'a tréjous resté dans l'esprit.
L' intitulement “Pus d'boulants, pus d'accidents, pus d'morts” en d'ssus eune articl'ye dans la gâzette du 22 d'janvyi tch'annonce 3,098 accidents d'motos et 13 morts dans les routes duthant l'année pâssée, est eune bouanne preuve qué 38,173 motos et 10,000 aut' boulants (j'pense bein qu'la grand' partie des 10,000 sont des camions) sont bein trop pour la grandeu d'l'Île. À m'n idée, il est grand temps d'controller l'nombre pour lé bein et la seûtheté du publyi.
Il est mème grand temps d'controller un tas d'choses en Jèrri. Lé problème dg'ieau, par exempl'ye. J'allons-t-i' beintôt aver nouos belles vallées touannées en mathes viyant tch'i' n'y a pon assez dg'ieau pour rempyi des bangnérêsses pour les touristes à lus lavechînner d'dans à la pliaiche dé lus patrouilli dans la bangnérêsse sus l'Mont d'la Ville ou aller à la mé sus nouos supèrbes grèves? Et en pâlant d'vallées, où'est tch'est “Queen's Valley?” Pourtchi qu' vouot' gâzette, Moussieu l'Rédacteu, continnue la mauvaise habitude dé donner des mênoms Angliais à nouos pliaiches, rues, c'mins et vallées? Quand un Jèrriais à l'êtrangi vait d'ité en liêsant la gâzette, i' n'y r'connaît pon san vièr Jèrri.
J'vai dans la gâzette qué les membres d's Êtats 'taient pour lus rêuni “en Conmité” dans l'mais d'févri pour considéther sa r'formâtion, mais i' faut craithe qué v'la tchi s'en va prendre du temps, car j'vai qué l'compte-rendu d'la séance des Êtats dans la gâzette du 29 dé janvyi n'en fait pon mention. Ch'est sîngne qué rein n's'en va s'faithe en vitesse. Ch'est don un bouan sîngne. Ch'est danmage qué les grosses têtes du parti Louothi à St. Ouën quand j'tais mousse né sont pus là pour aviser les membres d's Êtats à ch't heu. Il' 'taient absolûment expèrts en matchièthe politique, ches'-là, et il' apprîndrent mème ès Rôsièrs comment gouvèrner St. Ouën quand i' vindrent enn'yés d'gângni l's êlections et gouvèrner ieux-mèmes!
J'ai grand r'gret d'vaie qu' l'églyise dé St. James s'en va souffri l'méme sort qué l'églyise dé St. Simon. I' m'sembl'ye qué nouos grosses têtes ecclésiastiques sont à laîssi l'Angliétèrre les gouvèrner sans au mains êprouver à lus r'bînfrer. Né v'la chein tch'i' s'arrive quand nou change les vielles règl'yes. J'n'avons pus d'Douoyens natifs dé l'Île à combattre l's autorités. Et les changements tch'ont gavachi les mangnifiques vièrs sèrvices dé la Litourgie, qué j'connaîssons par tchoeu, et tchi sont supposés attither les jannes à l'églyise, n'ont pon agrandi les congrégâtions. À m'n idée, il' ont mème ieu l'rêsultat contraithe.
Mes félicitations à la pâraisse dé St. Martin. Sus dgiêx-sept noms mentionnés dans la gâzette du 22 d'janvyi comme étant assèrmentés par la Cour Rouoyale comme membres dé la police honorifique et d'la municipalité d'la pâraisse, seize des dgiêx-sept ont des vrais noms Jèrriais. Mangnifique! Nou n'vait pon ch'la souvent à ch't heu.
George d'La Forge
Viyiz étout: