Pouor bein des siècl'yes la ville dé Rome 'tait l'centre d'un empithe tchi contrôlait des tèrritouaithes lé tou d'la Mé du Mitan et pus liain.
La Républyique Romaine fut fondée au siêxième siècl'ye d'vant l'Christ et bétôt c'menchit à încorpouother des villes dans l'longis Italien. Ch't empithe 'tait un drannet d'villes et d'provînces gouvèrné par des magistrats êlus à Rome et l'Sénat d'Rome (tchi 'tait eune assembliée d'l'aristocratie d'Rome). La pus grande partie d'l'empithe fut ajouôtée souos la Républyique. Ch'tait don pouor longtemps un empithe sans empéreurs.
Du deuxième siècl'ye d'vant l'Christ y'avait eune séthie d'conflyits dans la Républyique et des dgèrres civiles coumme des hoummes et des factions littaient pouor lé pouver. En 44 d'vant l'Christ lé génétha Jules César prînt l'pouvé mais i' fut assâsinné par d's opponents. Lé fis adopté d'Jules César, Octavien, battit ses ennemîns et en 27 d'vant l'Christ lé Sénat lî baillit l'nom d'Audguste et les pouvièrs du gouvèrnément. En prîncipe la Républyique continnuait mais achteu ch'tait l's empéreurs en chèrge. La fanmil'ye d'Audguste otchupait la poste d'empéreu pouor les préchains quat' empéreurs auprès la mort d'Audguste.
Nou pâle d'la Paix Romaine tchi duthit pouor dans les deux chent ans d'pis l'règne d'Audguste jusqu'à la crise du traîsième siècl'ye. Ch'tait duthant chutte période qué l'empithe 'tais l'pus grand et où'est qu'lé centre avait l'pus d'contrôle sus ses tèrritouaithes.
En 212 auprès l'Christ la citouoyenneté Romaine fut baillie à touos l's hoummes nés libres dans l'empithe.
À seule fîn d'stabilîser et rareunner l'empithe, l'empéreu Dioclétien spartit l'empithe en quat, mais chu système né duthit pon. Ch'fut Constantîn l'Grand, l'preunmié empéreu Chrêtchien, tchi rêunnit l'empithe, mais i' fondit eune neuve capitale dans l'Êst, Constantinopl'ye. Lé drein empéreu tchi règnait sus les deux maîntchièrs d'l'empithe - du Vouêt et d'l'Êst - 'tait Théodose lé Preunmyi tchi mouothit en 395, ayant fait la Chrêtchienn'té la r'ligion officielle dé l'empithe.
L'Empithe du Vouêt c'menchit à s'êcrouôler souos l's attaques dé tribus Gèrmanniques (et d'aut') au chîntchième siècl'ye. Et l'empithe dans l'Vouêt vînt à fin en 476 quand l'rein empéreu du Vouêt abditchit. L'Italie 'tait achteu un rouoyaume et l's aut' tèrritouaithes du Vouêt lus êcaloppaient s'lon lus destîns.
Dans l'Êst l'empithe auve ses empéreurs tchi règnaient à Constantinopl'ye continnuait et par bordé êprouvait à r'gângni des tèrritouaithes au Vouêt. Mais l'avanche des Musulmans à l'Êst et les Crouaîsades lanchies par l'Vouêt affaiblyîtent l'empithe Romain. Lé drein empéreu Romain fut tué en batâle sus les muthâles dé Constantinopl'ye en 1453, quand les Turcots Ottomans prîntent la ville.
Au pus grand, souos l'empéreu Trajan (tchi règnait 98-117), l'empithe cont'nait ofûche un siêxième ou même un quart d'la polulâtion du monde. Les trais pus grandes villes dé l'empithe - Rome, Alexandrie, et Antioch - 'taient châtcheune dg'ieux deufais pus grandes qué les pus grandes villes Ûropéennes du dgiêx-septchième siècl'ye.
L'empithe 'tait multilîngue auve des difféthentes langues dans les provînces. Lé Grèc 'tait împortant dans la tchultuthe mais l'Latîn 'tait la langue militaithe. Lé Grèc d'vînt la langue la pus împortante dans l'empithe dé l'Êst, et dans l'Vouêt, coumme lé Latîn s'êcaloppait dans les difféthentes provînces auprès la tchête dé l'empithe, les langues romannes quémenchîtent à appathaître.
L'escliavage 'tait împortant dans la sociêté et l'êcononmie d'l'empithe jusqu'au chîntchième siècl'ye auprès l'Christ. Pouor la fîn du preunmié siècl'ye auprès l'Christ ofûche dans les 20%-30% d'la populâtion d'l'Italie 'taient d's escliaves (mais dans les 10%-20% dans les provînces hors Italie).
Les Romains avaient hardi d'dgieux et d'déêsses - es pus împortants avaient 'té empruntés ès Grècs. Au run d'împôser lus r'ligion sus l'empithe il' encouothageaient l'încorpouothâtion des dgieux locaux dans lus r'ligion. Auprès la Républyique des empéreurs 'taient dêifiés (procliâmés des dgieux) et eune èrligion d'Êtat d'mandait des sacrifices à l'empéreur. L'èrfus des Chrêtchiens d'sacrifier ès empéreurs sèrvit d'èrse pouor la pèrsétchution des Chrêtchiens dans des campangnes d'vant qu'lé Chrêtchiennisme fûsse accepté par l'empithe. Mais en prîncipe eune toléthance des difféthents tchultes 'tait l'règ'lye.
L'architectuthe romaine întroduisit l'arche, la votte, et la coupole partout l'empithe. Les c'mîns bâtis pouor lier les provînces et la capitale ont laîssi des mèrques même sus la carte des routes d'aujourd'aniet et y'a des bein villes fondées par les Romains coumme des forts militaithes tchi sont dév'nues des grandes villes împortantes.
Nou dit qu'"Tout c'mîn mène à Rome" et l'drannet des routes militaithes aîdgit au conmèrce et au contrôle adminnistrati.
Dans la sociêté Romaine lé bain 'tait hardi împortant et des bains publyis fûtent construits pouor la populâtion. Dans des maîsons privées y'avait étout des bains. Touos ches'-chîn 'taient abrévés par des tchuyaux et des ponts dg'ieaux tch'apportaient dé l'ieau des r'ssources et rêsèrveurs.
Les gens des provînces adoptaient les couôteunmes des Romains, et les grôsses têtes copiaient chein tchi 'tait faichonnabl'ye à Rome. Dans eune grande mésuthe l'empithe absorbait les peupl'yes vaintchus atout la tchultuthe mais si la paix 'tait m'nichie les forches militaithes 'taient faites sèrvi à seule fîn d'rêtabl'yi l'ordre.
Jèrri fut încorpouothé dans l'empithe Romain quand la Gaule fut contchéthie. Les Romains connaîssaient Jèrri (s'i' connaîssaient l'Île en tout) coumme Andium. Jé savons qu'i' y'avait du conmèrce à chu temps-là mais coumme tchi qu'ou 'tait la vie en Jèrri souos l'empithe Romain, jé n'savons dgéthe. Y'a raîque des êqu'sîns des Romains en Jèrri. Y'a un fanum - un sanctuaithe èrligieux - au Pinnacl'ye. Nou-s-a dêmuchi des pièches dé sou Romaines, mais n'y'a pon hardi d'êvidence dé maîsons.
Viyiz étout: