A George III, Statue Royale
La Statue du Rouai George II
|
Men chier George,
Je sie au d'zespé de ma vie, je fus passé men Noé sies ma belle soeu Jenneton, ai je prins frai en men r'venans, ai me vlo acheteu ove un bond d'goute acluqui au coin de l'âtre comme un vier picot enfalotai; j'en peux sorti pour oui rain, ai toute nos gens sont à couores les uns siez les autres à leus fêtes, ainchin je pensai en mé-même quis promaine, je men vais mé maittre en correspondance avec la Statue du neu Marchi, ai je ouirai tout. Ainchin, George, sit plait j'nos écrirons de tems en tems; car ch'nest pas pour te flaittai que je tel dis, mais de toutes nos statues tu es la pus respectable, car janmais tu n'oublis ta pliaiche, ai toute emanue que t'uest, tout le monde te respecte sus ten siège. Hélas! je srai bain si nou pouvait en dire autant de touos les achocres de bois que nou connais. Ainchin, George, comme tu entends toutes les chicanries et touos les secrets de l'isle, que les messieurs vaine te dire, conte me tout, je ten prie, ai j'nen pâslé à personne. Ecrit mé Samedi préchain si tuas l'tems. Je te souhaite un bouon Noé. Hélas nos v'chin à la fin d'une aoutre annais, et qués qui sait qués qui verra la fin de la préchaine? Quant à mé, j'ai bain des péchés à m'erprochi, mais il est ntrop tard de pensé à m'erformé. Ah quêque chez qu'les hommes! Ah si j'avais a r'quémenchi ma vie, jem mariérais à vingt ans. Hier au sé jérais donnai chins chlins pour un gouttin de grué oprès qué je fut cuochi, mais Nanci était horte siez les gens de s'namuoreux et j'resti à man tout fins seu dans la maison, ouesque la chianne se mins à ouasser qué jens vins tout drolle, pas qué j'avais peux justement, mais quand nou zès tuos seurs, jen sai pon. A la fin l'idaie m'vins de t'écrire, et j'em griyi une gobbletais de grog, et la quim passi les ners. Ainchi donc, asça, dit mé les nouvelles, chés ordres en Conseil et tout chu train, à quêque la qui sert? C'hest une impossibille, l'Angleterre, jammais né puora trébuqui notre Cour, j'en s'rai la chutte bouanne fais! Les Le Bretons sont des gens de grande famille, et la Raine ne prendra pas la libertai d'les êtrueulé dans la cohue comme d'la puortai. Et les partis comme est qui sont acheteu? Et la police et tout? dit mé toutes les nouvelles. Asça, si tu peux écrit mé Samedi préchain, car de vrai je sie ennié den oui rain..
Ten anmin sinsere,
Pierrot.
A George 3, Statue Royale,
Nouvé Marchi, St. Hélier.
Le Constitutionnel 31/12/1853
Viyiz étout: