S'lon un rapport d'l'Associâtion Médicale Britannique à ches drein, les docteurs n'dévthaient d'aut' mett' des cravates, car ches chiques portent, à chein tch'i' pathaît, des microbes par mouochieaux.
Nou-s'éthait peu craithe qué l'chef du parti Consèrvateu du Rouoyaume Unni, Dâvi Cameron, a fait ses êtudes en méd'cinne, li, car i' sembl'ye aver r'nonchi les cravates étout. J'allons-t-i' vaie la cravate horte pouor dé bouon?
Dans l'histouaithe, nou dit qu'la cravate veint d'la Croatie (tch'a nom "Hrvatska" en Croate) – si les cheins d'chu pays-là tch'avaient înventé la torpil'ye, la parachute et l'couothant altèrnant, avaient prîns l'nom d'vant chenna, j'éthêmes peu sans doute faithe affondrer des batchieaux atout des cravates, sauter d'dans d's avions et d'valer douochement à tèrre atout des cravates, et faithe marchi not' technologie en pliodgant dans la cravate. Mais nou-fait, ch'fut les soudards faichonnabl'yes d'la Croatie tch'amathaient d'la souaie ou d'la laine lé tou du co tch'avaient donné l'nom d'lus pays à ch't habillement.
En Jèrriais, j'n'avons pon d'distînction pouor eune cravate tchi nos caûffe et eune cravate qué nou porte auve un fa. Ch'est en tchi s'lon l'Dictionnaire Jersiais-Français, eune cravate est raique pouor s'garder caud. Mais l'Docteu Fraînque Le Maistre, tch'êcrivit chu dictionnaithe-là, n'tait pon entchéthinné pouor les cravates du tout, même s'i' n'tait pon un docteu d'méd'cinne et qu'san doctorat 'tait honorifique. I' n'mînt eune cravate dé fa qu'trais fais dans sa vie d'adulte: quand i' s'mathyit, quand i' fut honothé par un doctorat à Caën, et quand il èrchut s'n OBE au Palais Buckingham.
Libéthez don vos cos des chaînes en souaie tchi vos enhèrmèlent! Vive la santé! À bas les bactéthies et les cravates!
Geraint Jennings
Viyiz étout: