 eune mauve |
Eunne arlevée l'êté pâssé i' y'avait un coupl'ye des mauves de Gros Nez qu'étaient à lus r'poser sus la grève dans la Baie d'St. Ouen quand i' vîtent tout près d'ieux un coupl'ye d'mauves qu'i' connaisaient bein et qui d'meuthaient à La Corbiéthe. I' y'avait loungtemps qu'i' n'les avaient pas veues et i' lus mîntent à pâler du vièr temps - dé quand i' 'taient jeunes et qu'il' allaient à la pêque ensembl'ye.
I' caquetîtent pour eune pause et quand i' fut temps pour les siennes dé Gros Nez à s'en r'aller siez ieux il' invitîtent l'autre coupl'ye à v'nîn dîner auve ieux à Gros Nez lé lendemain au sé. "Ah, mèrci," dit la bouonnefemme mauve de la Corbiéthe. "V'là tchi nos f'tha grand pliaîsi. A tchille heuthe qu'i' faudra v'nîn?"
I' décidîtent pour sept heuthes, et né v'la les deux coupl'yes qui s'en r'vont siez ieux.
Lé lendemain au matîn la bouonnefemme mauve dé Gros Nez sé l'vit d'bouonne heuthe et s'mînt à netti san nid, tandi qu' san bouonhomme s'en fut à la pêque. Heutheusement i' y'avait eunne grand' mathée chu jour-lâ et i' rapportit tout pliein d'maqu'thé, du lanchon, des beinnis et jusqu'à des vlicots, qué sa bouonnefemme se mînt à êpinnotchi auve sa becque. Ou fit eunne belle salade étout, auve deux'trais sortes d'vrai, arosée auve dé l'ieau salée, Ch'tait réellement un magnifique èrpas.
Enfîn né v'là sept heuthes, et tout 'tait prêt - bein arrangi sus un rotchi - mais autchun sîgne des deux invités.
"Né t'gênes pas, ma vielle," dit l'bouonhomme mauve, qui viyait qu' sa femme pathaîssait un mio dêrangie. "Tu sai bein qué ch'n'est pas poli dé v'nîn exactement à l'heuthe quand nou-s-est învités d'aller tchique bord. J'crai bein qu'i' né s'sont pas loungtemps."
Mais quand vînt sept heuthes et d'mie, ch'est li qui c'monchait à être împatient at à châtchi la tête. "J'comprends pas ch'la; i' faut qu'i' sait arrivé tchiquechose pour les empêchi de v'nîn." Et, quart d'heuthe pus tard: "Oh, mais absolument, i' n's'en vont pas v'nîn. Jé futhons mus d'nos mettre à mangi." "Nou-fait. Nou-fait," sa femme lît dit. "A tch'est qu' tu penses? Tch'est qu'i dithont s'il' arrivent et qu'i' nos trouvent à mangi? I' faut arrêter aucouo un p'tit brîn."
Mais ne v'la huit heuthes qui sonnet à l'églyise et l's autre né sont pas 'couo arrivées. "Ah bein, chutte fais, i' n's'en vont pas v'nîn," dit l'bouonhomme. "Je n'gagnons paas rein d'atendre d'autre; j'm'en vais c'menchi". Et i' s'en allait happer un vlicot quand sa femme lî dit: "Arrête aucouo dgiex minutes. Et pis, s'i' n'sont pas v'nus . . . " Et justement coumme ou disait ch'na, ne v'là les deux mauves de La Corbiéthe qu'arrivîtent - toutes peineuses et toutes êssouffliées.
"Ah, mes bouonne gens," s'fit la bouonnefemme mauve dé Gros Nez. "J'taîmes si gênés, viyait qu'ou 'têtes en r'tard . . . . Tch'est qui s'est arrivé? Av'-ous ieu un accident?" Le bouonhomme mauve de La Corbiéthe châtchit ses plieunmes dévant s'assiéthe. "Ah, nennîn," i' dit tout trantchillement. "Mais ch'tait eunne si belle séthée qué j'avons décidé de v'nîn à pid."
S. Bisson
Viyiz étout: