La dernièthe fais - i'y a déjà tchiques mais - j'vos racontînmes des aventuthes dé Ph'lippe D'Auvergne, et j'vos pronmînmes d'pâler un mio entouor "La Correspondence", l'êtchipe dé gallants aristos, pasteurs, fraudeux, fripons et héros.
D'Auvergne 'tait ervenu en Jèrri auvec la responsibilité dé protegi l's Îles contre l'armée dé Napoléon. Toutes les fais qu'i' faisait néthe-niet, i' env'yait un baté à Portbas, eyou qu'i' laissaient eune bouëte bein êtantchie tout près d'un rotchi sus la grève. La bouëte cont'nait des lettres d'înstruction et des d'mandes pour de reseignments des Rouoyalistes français.
La fraude d'armes et d'ammunition ne d'vait pas être trop aisie, mais dans rein qu'un mais, D'Auvergne env'yit mille carabinnes et quarante milles cartouches tchi trouvitent lus destination sans peine.
Sa tache ne fut pas faite pus aisie par les ervoltés ieux-mêmes pa'ce que les siens de la Brétagne et de la Normandie 'taient tout l'temps à lus entr' chicangni.
Les gens de L'Île 'taient ordgillieux de ses travaux et de D'Auvergne li-même, mais i' n' s'accordait pas auvec san couosin germain, Ph'lippe Falle, lé Lieutenant Gouverneux.
En outre de la fraude, nou s'attendait qué D'Auvergne attèrrisse et muchisse les siens qu' avaient 'té officiers, pour qu'i lus battissent auve les Chouans contre les armées de Napoléon à l'arriéthe. Ches braves messieurs d'vintent les conviés dé D'Auvergne et chenna li couôti la pus grand' partie dé s'n allouange officielle.
Bein des siens qui suivaient D'Auvergne faisaient rédguliéthement des viages dangéreux et gentiment d'entre ieux fûtent attrapés et exétchutés, parmi ieux eune Jerriaise, Marie Le Sueur, qui fit bein des visites segretes à l'întérieur d'vant d'être à la fin happée.
P'têtre lé pus grand succès dé D'Auvergne 'tait s'n êtchipe d'éspions. Ses éspions dgèrnitent l'Amithauté et l'gouvèrnément britannique d'un plian de l'armée française d'envahi l'Irlande, et même d'eune învâsion dé l'Angliétèrre. Ches gens-là 'taient eune 'té niêsance que Napoléon li-même ordonnit la destruction dé "La Correspondence."
En 1803, D'Auvergne tchittit lé Vier Chaté et accatit eune grande maîson en d'houors d'la ville. I' la nommit "Bagatelle", et dans iune des appartéments, i'mint des meubl'yes dé Marie-Antoinette qu'il avait accaté duthant la Révolution. Dans ses gardîns i'gardait des chèrs.
Tout d'même, D'Auvergne voulait értouônner à la Prîncipauté dé Bouillon pour être couronné à la fin d'la dgèrre, mais ch'na n's'passit pon. Lé Congrès dé Wien annoncit en juin 1815 que san territouaithe s'en allait être cédé au Rouoyaume des Pays-Bas. Iun des p'tits-fis d'la soeu du vier Duc 'tait chouaîsi comme héthitchi à la pliaiche dé D'Auvergne, et s'n ércliâme comme fis adopté 'tait mint à la porte.
D'Auvergne értouônnit à Londres, et y mouothit au mais dé septembre 1816 en d'sastre, ayant emprunté eune pile dé sous pour payi les officièrs dé la Prîncipauté, et n'pouvant pon érpayi ses créancièthes. Bein dêchu, i'fut entèrré à Londres à l'âge dé souaixante-deux ans.
Viyiz étout: