A la siette d’eune annonce tch’avait pathu sus la gâzette du sé, un groupe înfluentiel dé pèrsonnes v’nant dé plusieurs pâraisses, lus rencontrîtent dans la Salle dé la Sociêté Rouoyale d’Agritchultuthe, numétho trais, rue Mulcaster, St. Hélyi, Vendredi au sé l’23 d’Novembre, pour considéther des mouoyens pour avanchi l’étude et la consèrvation d’la langue Jèrriaise.
Auprès eune longue distchussion concèrnant la maniéthe qué nou pouorrait adopter pour rêvilyi l’întéthêt dans la vielle langue, et l’maint’nîn en dêpi d’l’angl’yicisation tchi, malheutheusement, est en train d’l’engaumer, i’ fut décidé d’former eune sociêté, - et l’Comité fut enchèrgi dé chèrchi pour un nom pour lî donner.....
La sociêté s’rêunitha l’drein Vendredi d’châque mais, a c’menchi du 25 dé Janvyi 1952. La souscription a ‘té mînse à 10/- par an, et nou-s espéthe qué touos les gens tchi sont vrainment intérêssis dans l’objet méthitouaithe du groupe s’en vont jouaindre dé bouan tchoeu. Il est sustout à souhaiter qué la grand’ partie des cheins tchi, châque année, vont à la Séthée Jèrriaise dé l’Eisteddfod et lus y pliaisent si bein, s’en vont dév’nîn membres.
Lé programme des travaux et d’êtude es’sa pustôt décidé quand les membres lus rêunithont à la fîn d’Janvyi....
Chroniques de Jersey 5/12/1951
Viyiz étout: