L'Assembliée du mais d'mar eut lieu vendrédi passé à 8 heuthes du sé dans la Salle d'Agritchultuthe, neunmétho 3 Rue Mulcaster. Ch'tait vrainment bein encouothageant de vaie les membres en si grand nombre, car le temps 'tait péthissablye.
Duthant la séthée le président, le Sénateu H. Le Riche Edwards, assisté par Mme. P. Green et Mêssieurs F.J. Hacquoil et G.W. Bertram, rêponnîtent à eune vingtaine dé tchestchions apportées par les membres. ches tchestchions 'taient bein variées, et certainement i' y'en avait pour touos les goûts.
La preunmièthe 'tait: “A votre idée, tch'est qu'est la miyeu manièthe dé prépather les pieuvres pour la tablye?” Nos mêssieurs, dans chu cas 'chin, lus montrîtent pus êrudits qué la dame dans l'art dé faithe la tchuisine. I' nos explyitchîtent l'affaithe comme i' faut, et ach't'eu jé savons tous parfaitement bein comment les tchuithe.
La tchestchion tchi fit pus d'amusement 'tait: “Pourtchi qué l'mal ès dents est appelé l'ma d'amour?” I' nos donnîtent des raisons scientifiques et êdifiantes pour chu étrange phénomène. M. l'Juge F.V. Lé Feuvre nos liut eune explyication hardi logique et convaintchante qu'un anmîn à li avait écrit.
La préchaine 'tait: “Est-che pôssiblye d'aver un coup d'leune?” Nos gens 'taient bein d'opinion qué v'là tchi s'arrivait malheutheusement trop souvent. Lé Sénateu Edwards nos dit qué par précaution i' freunmait tréjous ses ridjeaux pour sé faithe seux qué la leune n'éthait pon d'êffet sus li!
La 4e tchestchion: “Est-che qué l'Jèrriais dé St. Ou est pus correct qué lé St. Martinnais?” Un moussieu dé l'Est est d'avis qué lé St. Ouonnais est trop pliat; par contre lé chein du Ouêst nos montrit qué les Amontains traînent lus mots bein trop.
La sienne tchi suivit 'tait tout à fait topique: “V'là tchi fait-i' autchun bein ès femmes d'aller lus parlochi ès 'Women's Institutes'?” Nos hommes n'étaient pas du même avis, mais la dame nos dit qué ches rêunions là 'taient dé telle împortance que l's hommes né d'mandaient pas mus que d'y'aller étou.
“Tch-est qu'ou criyiz des femmes tchi feunment dans les rues?” I' n'y'a pon autchun doute tch'est qu'nos gens en pensent! I' 'taient tous d'opinion qué ch'est eune bein vilaine habitude.
Neunmétho 7: “Pourtchi qué les femmes ont tréjous peux des souothis?” L'explyication 'tait sans doute qué l'temps passé quand les dames portaient dé longues patouolles de cotillions, v'là tch'offrait eune muche à chutte pétite vèrminne.
Les 8e, 9e et 10e souôl'vîtent des ardguments opposés, car tous né sont pas d'accord qué l's'êfants dév'thaient apprendre lé Jèrriais à l'êcole. A chu moment-chin lé Juge Lé Feuvre suggéthit qué l'Assembliée dév'thait faithe împrînmer un “recueil d'écrits” jèrriais qué l's'êfants pouorraient liéthe.
Deux tchestchions apportées par Me. F. Le Maistre sé trouvîtent trop difficiles et i' dut nos en donner l'explyication li-même: “Tch'est qu'est la difféthence d'la brêque d'hielle et des mannes à fou?” et “Tch-est qui vaut mus - du r'lîndîndîn ou des p'tits parmafévéthes à pattes jaunes?”
Eune tchestchion sus l'divorce fut présentée et rêponnue auve întelligence et du point d'veue Chrétchien.
I' fut tchestchion dé rempliéchi les bouais gavachis duthant l'Otchupation et i' semblye qué l's'Autorités sont à faithe dé lus mus, mais qué malheutheusement les avièrs en saccagent bein trop.
La dreine tchestchion 'tait à l'êgard des Membres d's'Etats tchi chouaisissent d'aller examiner les Mîntchiers au temps des mathées du mais d'mar au lieu d'y' aller au mais d'juîn quand i' fait bé. Par les rêponses il est bein êvident tch'est qu'est l'objet pourtchi tch'i' chouaisissent chu temps-là pour aller en visite maritimme!
A la fin d'eune séthée animée, lé président èrmèrcyit les gens pour êt' vénus et pour aver donné des tchestchions d'un caractèthe si întéressant.
Evening Post 3/4/1952
Viyiz étout: