Les Pages Jèrriaises

 

 

Eune séthée dé 'Moussieu et Madanme'

L'Assembliée d'Jèrriais

 

L'Assembliée d'Jèrriais

 

Eune septantaine dé membres lus rêunîtent vendrédi, lé preunmyi d'décembre, dans la Salle Pârouaîssiale dé St. Jean à huit heuthes lé sé pour eune séthée dé “Môussieu et Madanme".

Lé Vice Président, lé Juge R. H. Le Cornu, prînt la tchaîse pour c'menchi la séthée et d'vant les affaithes d'mandit a tous dé lus l'ver et obsèrver eune minnute dé silence en mémouaithe dé Mde. L. Renouf.

La Ségrétaithe liut lé rapport du jeu d'cartes et trais nouvieaux membres fûtent êlus. Les affaithes finies, lé Juge Le Cornu d'mandit au Sieur Brian Vibert dé prendre la tchaîse coumme maître dé cérémonies pour la compétition auvec l'aide des Dlles. Audrey Le Feuvre.et Ruth Amy.

Y'avait ieu huit coupl'yes dé chouaîsis et lé Juge G. A. Le Breton et sa danme 'taient les preunmièrs.Y'avait siex tchestchions, trais pour les danmes et trais pour les hommes. Moussieu et Madanme Le Breton fîtent bein et rêponnîtent quat' des tchestchions sans hésitations. Les préchaines coupl'yes 'taient lé Sieur S. et Mde. Le Cornu, lé Sieur H. F. et Mde. Vibert, et lé Sieur L. et Mde. Rondel. Ches coupl'yes lus entreconnaîssaient pas si bein, mais 'taient à lus rêjoui. Lé Sieur W. et Mde. Giot fîtent bein et n'eûtent qu'eune mauvaise rêponse, et 'taient bein vite à rêpondre les tchestchions. Lé Sieur S. J. Morel et Mde. Morel 'taient la même chose. Lé Juge Le Cornu et sa danme rêponnîtent toutes les tchestchions et lé Président et Mde. Richard étout.

Y'avait eune bouanne sélection de tchestchions coumme, par exempl'ye “Vouot' homme ronflye-t'i?", “Rêve-t'i?" ou "Coup-d'pise-t'i'?", "Combein d'sou qué vouot' homme porte auvec li en ville?", "Vouot' femme fait-allee sèrvi un couté spécial à p'ler les patates ou eune machinne ou un couté ordinnaithe?". "Tch' qu'est la dreinne chose qué vouot' homme hale dévant s'couochi?", "Si vouot' femme est pour vos rencontrer en ville, es'sa-t-alle en temps ou tchiques minnutes tard?”, et plusieurs autres. Touos les coupl'yes èrchûtent eune boêtée d'chocolats et d's appliaudissements dé l'audience.

Lé Président ermèrcyit lé Sieur Brian Vibert et les Dlles. Le Feuvre et Amy pour aver arrangi eune si bouanne séthée, lé Juge Le Cornu pour aver c'menchi la rêunion et Moussieu l'Connètabl'ye d'St. Jean pour l'usage d'la salle. Le Conmité Exétcutif sèrvit du café et d's galettes à tous.

 

JEP 3/1/1979

 

 

Viyiz étout:

 

 

 

 

Les Pages Jèrriaises