Quâsi chent membres et anmîns d'L'Assembliée d'Jèrriais lus rêunnîtent Vendrédi lé 23 d'Févri 2001 à la Salle Pârouaîssiale d'La Trinn'té pouor eune séthée d'Bîngo.

Auprès les formalités d'la rêunnion, l'Président mînt la séthée dans les mains du Conmité Dranmatique. L'Maît' dé Cérémonies 'tait l'Sieur Roy Cudlipp.

Lé Sieur Cudlipp annonçait les neunméthos en Jèrriais et en Angliais, même si les joueurs dans la salle n'taient pon tréjous du même avis sus la prononciâtion des neunméthos et en faîsaient des commentaithes! Mais il en est tréjous d'même auve la prononciâtion du Jèrriais.

La preunmié gamme 'tait pouor eune plieinne carte auve un prix dé £10, et ou fût gângnie par Mde. Amelia Perchard.

La deuxième gamme 'tait pouor la lîngne à haut pouor £5 et finni la carte pouor £10.

La traîsième gamme 'tait pouor les quat' cârres, auve un prix d'£5.

La quatrième gamme offrait £10 pouor la lîngne du mitan - et y'eut deux gângnants tch'èrchûtent £5 châtchun - et finni la carte pouor £10.

Nou gângnit £5 pouor la lîngne à bas dans la chîntchième gamme, et £12 en finnissant la carte. Mais y'eut trais joueurs à finni la lîngne en même temps, et don nou dêcidit d'lus donner £2 châtchun. Mais même pus tchuthieuse 'tait la situâtion à la fîn d'la gamme quand j'eûmes siêx gângnants à finni lus cartes en même temps. Il' èrchûtent £2 châtchun.

Et la dèrnié gamme avait coumme prix £20. Et chutte fais y'eut deux gângnants auve £10 châtchun.

Pouor finni la séthée les rafraîchissements fûtent sèrvis.