Lé dgiêx-sept dé Novembre 1951 ch't' annonce fut publiée dans la gâzette du sé:
| “Avis: Touos les Jerriais tchi d'sithent conserver not' vieille langue sont invités dé s'rencontrer VENDREDI lé 23 d'Novembre dans la Salle d'Agritchultuthe Rouoyale, numétho 3 Rue “Mulcaster,” à huit heuthes au sé pour former une Sociêté pour êtudier et consèrver la langue Jèrriaise. Tous s'sont les beinv'nus.”
|
L'Juge Francis Vibert Le Feuvre avait pâlé d'l'idée d'former eune associâtion en donnant s'n adjudicâtion à la Séthée Jèrriaise d'l'Eisteddfod en 1951, et les Sieurs George Winter Bertram et Frank Trachy dêcidîtent dé mett' eune annonce dans la gâzette.
Lé 23 d'Novembre don, l'associâtion fut fondée par 27 pèrsonnes tchi lus rêunnîtent à la Salle d'Agritchultuthe. Lé preunmié Président 'tait l'Sénateu Hedley Le Riche Edwards et l'preunmié S'grétaithe 'tait George F. Le Feuvre, tch'est bein mus connu coumme “George d'la Forge”, grand auteu du Jèrriais du vîngtchième siècl'ye.
L's objets d'la Sociêté fûtent adoptés à la preunmié rêunnion mensuelle au mais d'Janvyi 1952:
“La consèrvâtion et la pèrpétuâtion d'l'usage dé la langue Jèrriaise par les mouoyens d'assembliées, dé distchussions, productions littéthaithes ou dramatiques, et autchun aut' mouoyen ou activité agréés et approuvés par lé Conmité enchèrgi d'en décider, et l'encouothagement d'êcrituthes et travaux originnaux et méthitouaithes.”
Mais, la Sociêté n'avait pon acouo d'nom et i' fut dêcidé d'èrmett' la tchestchion à la préchaine rêunnion. Lé vîngt-trais d'Févri, nou liut dans la gâzette l'annonce tchi sied:
“La Sociêté pour Consèrver l'Jèrriais: L'Assembliée mensuelle étha lieu VENDREDI tchi veint, lé 29 dé Févri, à 8 heuthes au sé, dans la Salle d'Agritchultuthe, numétho 3 rue Mulcaster, St. Hélyi. Lé nom d'la Société s'en va êt' chouaisi, et eune distchussion étha lieu sus l'sujet: “Qué les femmes dév'thaient rempliaichi l's'hommes dans l's'Êtats au pus vite possibl'ye.” Touos les membres sont învités à prendre eune part active dans la distchussion pour et contre, et un vote es'sa prîns à la fin pour décider les gangnants. Touos sont les beinv'nus.”
S'lon l'rapport tch'appathut dans la gâzette lé trais d'Mar 1952, les deux tchestchions fûtent rêponnu d'eune manniéthe decisive par la quarantaine dé membres présents:
“lé nom "L'ASSEMBLIEE D'JERRIAIS" fut adopté par eune grand' majorité.”
Mais à la fîn du d'bat entouor les femmes dans l's Êtats:
”Quand les vouaix fûtent comptées l'y-avait eune grand' majorité en faveur dé laissi les femmes à la maiethon à faithe d'la bouanne soupe et souangni du mênage, viyant tch'il' ont prouvé tch'i' peuvent faithe ch'la mus qu'autcheun homme - et d'laissi ls'hommes continuer comme membres d's'Etats - ch'est-en-tchi, Messieux les Législateurs, n'séyiz pon épeûthés pour lé moment - ou-s êt' acouo solides dans vouos siéges législatifs!”
J'éthions-t-i' l'même rêsultat chînquante ans pus tard? Jé n'criyons pon, viyant qu'lé Président d'achteu est l'bouanhomme à Madanme la Députée Scott Warren dé St. Saûveux!
Novembre 2001
Viyiz étout: