.
L'Assembliée d'Jèrriais eut san jour dé naissance lé 23 d'Novembre, 1951, quand 27 personnes intérêssies dans l'êtude et la consèrvation d'la langue Jèrriaise lus rêunîtent dans la Salle d'Agritchultuthe à St. Hélyi, à la siète d'eune annonce tch'avait 'té minse dans la gâzette par Mêssieux George Winter Bertram et Frank Trachy.
L'idée d'former eune assembliée d'Jèrriais fut originellement mentionnée par lé Juge Francis Vibert Le Feuvre dans l'couothant d'san discours comme Adjudicateur à la Séthée Jèrriaise à l'Eisteddfod dé 1951. A eune séthée sociale siez l'Sieur George Winter Bertram dans l'mais d'Novembre en r'vénant, Mme. Florence Perrier fit la r'mèrque au Sieur Bertram qué ch'tait danmage qu'eune association d'Jèrriais n'existait pas, et tch'i' dévthait prendre l'initiative et en former ieune. Ch'tait ch'la tchi li donnit l'idée d'mett' l'annonce dans la gâzette. Il en pâlit à Frank Trachy, tchi l'encouothagit, et ch't'annonce-là fut, nou peut dithe, lé cèrtificat d'naissance dé l'Assembliée d'Jèrriais !
Du tout c'menchement l's objets d'l'Assembliée, la consèrvation et la pèrpétuation d'l'usage dé la langue Jèrriaise, et l'encouothagement dé s'n êcrituthe, ont 'té gardés en veue des membres par lé Sénateu Hedley Le Riche Edwards - tch'a l'honneu d'êt' lé preunmié Président - ses Officièrs, et l'Comité êlu pour condithe les activités et l's'affaithes dé l'Assembliée.
Les rêunions mensuelles ont ieu lieu châque mais sans mantchi. Lé nombre dé membres présents a continué à grandi à châque rêunion. L'y-en avait eune souaixantaine à la cheinne d'Avri, et chu nombre-là a 'té dépassé d'pis. L'y-en avait pus d'septante à la rêunion du mais d'Mai et eune huiptantaine à la rêunion du mais d'Août. Toutes les rêunions, à l'exception d'ieune, ont 'té dans la Salle d'Agritchultuthe, l'exception étant la rêunion d'Juillet en pliein air au Vièr Châté à Gouorré. Si l'nombre dé membres continue à grandi - comme lé Comité l'espéthe - i' faudra beintôt trouver eune pus grand' salle dé rêunion!
Lé Comité, étout, a êprouvé à varier l's activités d'châque rêunion autant qu'possibl'ye, et à ieune des rêunions l'Trésôryi George Winter Bertram apportit sa lantèrne magique (app'lée scientifiquement un "ciné-projecteur"), et montrit sus l'ridgieau des scènes aninmées des côtes et des grèves dé Jèrri dépis l'Chaté d'Grosnez jusqu'au Vièr Chàté à Gouorré - des gens à la pêque, et cèrtaines activités officielles, comme, par exempl'ye, la Visite Rouoyale, et donnit eune description en Jèrriais des scènes à m'suthe tch'i' dêfilaient du projecteur. Ch'tait probabl'yément la preunmié fais dans l'histouaithe dé Jèrri qu'la lantèrne magique fut montrée en Jèrriais!
Des vièrs noms et expressions Jèrriaises ont 'té dênichis et présentés en rêunion, et pour faithe les membres les ramémouaither il' ont 'té d'mandés dé donner l's êtchivalents en Angliais.
Dans l'couothant d'ses dgiex mais d'vie, les membres d'l'Assembliée ont 'té învités à présenter les noms en Jèrriais des paîssons, des flieurs et pliantes sauvages et des ouaîsieaux, auve lus êtchivalents en Angliais ou aut' langue. Des listes dé ditons Jèrriais concèrnant l'temps ont 'té présentés étout. Nou peut dithe qué l'întéthêt des membres a grandi à m'suthe qué l'temps va: trais membres apportîtent des noms d'paîssons, sept membres des noms d'flieurs et pliantes sauvages, huit membres des ditons, et neu membres des noms d'ouaîsieaux.
Les listes ont 'té examinnées et vérifiées par un Comité Adjudicateur, et arrangies en ordre alphabétique pour publyication par le Ségrétaithe.
Lé Comité est r'connaîssant à Moussieu Harrison dé l"'Evening Post" pour la publyication gratuite des listes, et des rapports dé rêunions mensuelles, et à Moussieu Edmond Delaquaine, dé "La Chronique," pour la publyication gratuite dé nouos annonces et rêunions mensuelles dans sa colonne dé "Petites Nouvelles". Ches deux mêssieux ont montré hardi d'întéthêt dans l's activités d'l'Assembliée et nouos ont souhaité bouanne chance.
Ayant en veue la consèrvation et la pèrpétuation des r'chèrches et travaux d'l'Assembliée, lé Comité considéthe qué ch'n'est pon suffisant d'les publiyer dans les gâzettes. Un tas d'monde les mettent dé côté eune fais liues, et i' lus trouvent pèrdues ou dêtruites. Pour ches raisons, lé Comité est d'avis qu'un bulletîn dévthait êt' publiyé pus tard - disons eune fais par quart-d'an - mais la tchestchion d'publyication entraîne des frais et du travâs d'rédaction. D'en par ichîn, considéthant tch'i' faut êt' p'tits d'vant qu'êt' grands, lé Comité a décidé tch'i' fallait aller douochement et attendre tchique temps pour s'asseûther d'eune pétite rêsèrve d'fonds dévant mett' l'affaithe dévant l'Assembliée.
L'opporteunité d'aver eune rêunion en pliein air d'été n'a pas 'té mantchie, et pour l'associer auve la bieauté et l'histouaithe dé nouos monuments historiques, l'Assembliée s'rêunit au Vièr Châté à Gouorré, et êcoutit - auve attention et întéthêt iun des membres, lé Cap'taine Josué Emile Dorey, Gardgien du Châté, raconter s'n histouaithe en Jèrriais, probabl'yément pour la preumnié fais en temps modèrne.
Pour lé moment, i' faut dithe qué l'Assembliée a fait un bouan c'menchement, qué s'n av'nîn dépend d'l'êffort futur des membres, agissant individuellement et collectivement, et qu'l'y-a bouanne espéthance pour lé temps à v'nîn.
Pour, et au nom du Comité,
H. LE RICHE EDWARDS,
Président.
GEORGE F. LE FEUVRE,
Ségrétaithe.
Viyiz étout: