La rêunion mensuelle, eune séthée dé "Tchi mêtchi?", eut lieu vendrédi, lé 25 novembre, dans la Salle Publyique dé St. Martîn.
D'vant c'menchi lé Président d'mandit ès membres dé lus l'ver et obsèrver eune minnute dé silence en mémouaithe dé Mde. I. de Gruchy. Lé rapport du jeu d'cartes fui liu et accepté et neu nouvieaux membres fûtent êlus. La correspondance fut liue et l'Président dit que l'dînner annuel étha lieu à l'Hôtel L'Horizon, jeudi, lé 16 dé févri, 1978.
La séthée continnuit auvec "Tchi mêtchi?", les membres dé l'êtchipe étant la Dlle. K. Le Boutillier et Mde. I. Pallot, les Mêssieux lé Député G. N. Simon et lé Connètabl'ye W. J. Tomes.
Les membres tchi prîntent étaient part Mde. Eileen Le Sueur, qu'était la preunmiéthe à gângni san mêtchi, "à mettre d'accord un piano"; deuxième, la Dlle. C. de Gruchy, tchi gângnit auvec “attatchie par un homme et ou l'tue"; lé Sieur G. Perchard ("À pliaichi eune tente”), la Dlle. M. Renouf (“boutitchiéthe”), la Dlle. Audrey Le Feuvre (“couotuthiéthe”), lé Sieur Colin Vibert (“ramonneux”), Mde. M.J. de la Haye (“à vendre eune gâche dé neuches”), lus mêtchièrs étant tous d'vinnés par l'êtchipe ; et Mde. P. Hughes ("jouer les disque” ), lé Sieur Harold de Gruchy ("à faithe eune botte d'ouognons") et Mde. P. Green ("nettisseux de f'nêtres”), tchi gângnîtent.
Ichin nou d'mandit à l'êtchipe d'èrconnaître tchiqu'un, et ch'tait Mde. Amelia Perchard - auprès deux-s-trais tchestchions sa vouaix fut èrconnue.
Y'eut eune autre touonnée et l'êtchipe en d'vinnit six sus les dgix : "à prépather un picot pour Noué" , "sé tromper d'pliaiche”, “souongneux d'pompe d'essence”, "à faithe d'la g'lée d'rhubarbe", "à picoter des tomates", "fonctionnaiethe", “à poli du tchuivre", “voleux”, "à tenvri du vèrjus" et "un m'sutheux d'êlectricité”.
Auprès, lé Conmité Exétchutif sèrvit du café et des galettes à tous, et lé Président èrmèrcyit lé Connétabl'ye pour la salle et tous pour être v'nus. Lé Connetabl'ye dit qu'i' 'tait content d'vaie L'Assembliée autchun temps.
JEP 16/12/1977
Viyiz étout: