J'sis Brian Gilbert dé l'Assembliée d'Jèrriais et j'men vos dithe tchique chose entouôrre les èvénements de l'assembliée tchi sé sont pâssée duthant l'année 1999 et vos renseigni dé chein qué j'avons idée dé faithe pour amusé les gens et vos donné la chance dé v'nîn êcouté et pâlé du bouon Jèrriais.
L'année 1999 s'est pâssée hardi bein et j'm'en vais vos raconté tchiques des principales événements.
Lé Sèrvice Annuel dans l'Eglyise dé la Ville, auvec lé Pastor Brian Vibert à prendre lé Sèrvice, fut bein supporté et y'avait eune bouonne atmosphéthe. Le Doyen fit la beinvenue et restit dans l'églyise pour lé sèrvice.
La touônnée en lorries, auvec du bieau temps et un bouon r'pas ès Wolf Caves pour fini la sethée fut bein apprécyiée.
Un autre événement tchi fut un grand succès fut la journée en France par bâté.
Deux coaches nos attendaient à St Malo et pis fillitent pour Dinard et la vielle ville dé Dinan, acouo lé temps 'tait bé su jour la et j'visitîmes lé nouvieau aquarium à St Malo.
Au mais d'Septembre les Dgèrnésiais vintent nos joindre pour la journée. Auvec un bouon nombres dé Jèrriais, dans deux charras, j'fûmes faithe un tour dé l'Ile et comme d'amors j'nos arrêtîmes à plusieurs bords pour mangi.
J'fut bein encouothagi dé vais un tas dé jannes à prendre part à l'Eistedfodd dans les deux sethées d'Jèrriais à la Salle Publique de St Martîn, au mais d'Novembre, v'la tchi montre qué lé Jèrriais est acouo vivant.
Ieune de nos grandes sethées est lé sèrvice dé 9 leçons et cantiques dé Noué à l'Eglyise dé St André suivi par un bouon souper dans la salle à côté.
Pour l'année 2000 j'avons ieu lé 28 dé Janvyi eune séthée de 78s records à St Jean, organisé par Les Etudgiants.
Lé 25 dé Févri ch'tait un concèrt organisé par lé conmité dramatique, à St Jean étout.
Lé 18 dé Mars estha lé diner annuel, ch't'année à l'Hotel Ambassadeur, j'éstha eune occâsion spéciale car j'éstha nouôtre preunmyi diner du Millénnaithe et lé conmité social 'tait en chèrge. Lé diner 'tait à 7 heuthes du sé.
Lé 30 d'Avri ch'tait lé sèrvice annuel, ch't'année à l'Eglyise St Georges à St Ouën, auvec lé Sieur François Le Maistre comme Prédicateur.
Lé 19 et 20 dé Mai est la Féte dé la Vielle Langue en Dgèrnésey, ch'na est aux Vauxbelets et y'en à d'nous tch'éspethe d'y prendre part.
Le 26 d'Mai, Les Etudgiants nos amusethants à la Salle dé St Cliement, auvec la Dlle Fiona Le Goupil et sa Dixieland Band.
Le 1 Juilet éstha un r'pas à la broche ès Mielles à St Ouën organisé par le conmité dramatique - détails pus tard.
Lé 31 d'Aout est eune journée en Dgèrnésey, eune visite qu'est tréjous bein organisée j'éspéthons qu'un bouon nombres de Jèrriais y veindront.
La Foire dé Jèrri (Country Fair) à la Howard Davis Farm, qu'a lieu touos les deux ans, est du 7 au 9 Septembre et j'avons értenu un stand dans ieune des grandes tentes, j'éspethons qué nos trais conmités s'en vont sé mettre ensemblye pour organisé ches journées là. J'éthons lé stand du Don Balleine à côté de nous et y'l éthont lé dictionnaire et d'autres litteratuthes à vendre.
Lé 29 dé Septembre éstha la réunion annuel à St Martin et v' la tchi finnitha les événements pour l'année dé l'assembliée.
Lé temps s'passe vite et j'érsethons bein vite à l'Eistedfodd et lé Sèrvice dé Noué euné autre fais.
A toutes nos séthées un bouon souper est sèrvi. L'assembliée est bein active, d'même v'nez nos joindre, ou 's'étes les beinvènus. V'nez êcouté du bouôn vièr Jèrriais.
Brian Gilbert
Viyiz étout: