Dans les chînquante membres d'L'Assembliée d'Jèrriais lus rêunnîtent à la Salle Pârouaîssiale d'La Trinn'té lé 26 d'Janvyi 2001 pouor eune danse paysanne.

La Caesarean Ceilidh Band 'tait sus la strade pouor jouer la mûsique. L'annonceuse d'la mûsique dit tchiques patholes dé beinv'nue en Jèrriais:

"Bônsouair Mesdames et Messieurs. J'sommes la Caesarean Ceilidh Band. J'espéthons aver un mio d'dans'sie"

Et pis ou c'menchit à explyitchi les danses.

Bein seu, ché n'taient pon des danses traditionnelles dé Jèrri. La mûsique 'tait Êcossaise et y'avait p't-êt' un mio d'mûsique Irlandaise étout. Pouor lé dithe tout court, ch'tait d'la mûsique Celtique.

En Jèrri, j'avons pèrdu nos vielles danses et don ch'n'est qu' bein rarement qué ch'est pôssibl'ye d'organnîser eune danse - mais les cheins tchi 'taient là pouor la Danse Paysanne lus en rêjouîtent.

Y'avait chîn danses duthant la séthée, et acouo d'la mûsique entre les danses pouor laîssi un mio dé temps pouor mangi et s'èrposer.

La preunmié danse fût eune danse en cèrcl'ye. Dans chutte danse les danseurs lus prom'naient l'tou d'la salle dans des coupl'yes.

La deuxième danse fût eune danse en lîngne (un "reel") dans tchi qu'les danseurs avanchaient et touônnaient lus parchonnièrs.

Pouor la traîsième danse, y'avait deux lîngnes dé chînq coupl'yes. Auve toutes les actions, les gens avaient d'la diffitchulté à lus ramémouaither par ioù tch'i' faut aller, mais les cheins tchi dansaient vaient du fanne - et les cheins tchi restaient assis avaient bein du fanne à r'garder la dans'sie.

La quatrième dans 'tait eune valse, et pouor finni la dèrnié danse fût un "shuffle" auve deux lîngnes. Et pouor chutte dèrniéthe i' fallait r'muer tchiques tabl'yes à seule fîn qu'les danseurs aient assez d'run.

Duthant la séthée, des pais au fou fûtent sèrvis, et d'la gâche et du thée et du café et du cidre.

La séthée 'tait bein appréciée par les cheins tchi 'taient là.