Né v'chîn eune vielle copie des règl'yes dé L'Assembliée d'Jèrriais
OBJETS
La consèrvâtion et la pèrpétuâtion d'l'usage dé la langue Jèrriaise par les mouoyens d'assembliées, dé distchussions, productions littéthaithes ou dramatiques, et autchun aut' mouoyen ou activité agréés et approuvés par lé Conmité enchèrgi d'en décider, et l'encouothagement d'êcrituthes et travaux originnaux et méthitouaithes.
RÈGL'YES
1 (a) - L' Assembliée Générale Annuelle étha lieu au mais d'Septembre dé châque année. La date es'sa décidée par lé Conmité à sa rêunion dans l'mais d'Août.
(b) - L'Assembliée mensuelle étha lieu lé drein vendrédi d'châque mais, autant qu' pôssibl'ye, ou à la discrétion du Conmité Exétchutif si l'dèrnié vendrédi né conveint pas.
2 (a) - L's affaithes dé la sociêté es'sont condites par un Président, deux ou plusieurs Vice-Présidents, un Trésôryi, un Ségrétaithe, iun ou plusieurs Ségrétaithes-Assistants, et un Conmité d'siex membres tchi s'sa enchèrgi d' exétchuter les travaux et l's affaithes dé la sociêté et d' en faithe rapport à châque assembliée. Il en faudra sept pouor faithe un quorum. La direction et l'adminnistrâtion des affaithes dé L' Assembliée généralement es-sont condites par chu Conmité Exétchutif.
(b) - Lus gestions finnithont à la fin d'châque année, mais i' pouôrront êt' rê-êlus pouor iun ou plusieurs nouvieaux tèrmes d'office.
(c) - Lé Conmité a l'drouait d'ajouôter à san nombre.
(d) - Iun ou plusieurs Présidents d'Honneu peuvent êt' êlus.
3 - Lé d'ver d'l'Assembliée Générale Annuelle es'sa :
(a) - D'èrchéver du Conmité un rapport des activités et d' s affaithes dé la sociêté duthant l'année.
(b) - D'èrchéver du Trésôryi un rapport finnancyi d'la sociêté, arrêté au 31 ième jour d'Août.
(c) L'êlection des Officièrs et du Conmité, et la nominnâtion dé deux Auditeurs tchi s'sont enchèrgis d'examinner et d'cèrtifier l'exactitude des comptes du Trésôryi et d'l'êtat finnancyi d'la sociêté dévant les présenter à l'Assembliée Générale Annuelle.
(d) - La considéthâtion d' autchun changement proposé au sujet d'ches règl'yes-'chin, a condition qué tel changement ait 'té proposé par un membre, par êcrit, et mîns entre les mains du Ségrétaithe pas pus tard qué l'tchînze d'Août pouor qué l'Conmité ait l'temps dé l'considéther et d'faithe sa r'quémandâtion à l'Assembliée Générale Annuelle, tch'en décid'da.
4 - Lé Président étha lé d'ver d'présider à toutes les assembliées ou rêunions des membres du Conmité. Dans s'n absence, iun des Vice-Présidents lé rempliaich'cha. Si l'Président et les deux Vice-Présidents sont touos absents, iun des membres du Conmité es'sa chouaîsi pouor présider.
5 - Lé Trésôryi présent'ta un êtat des finnances dé la sociêté à l'Assembliée Générale Annuelle. Dévant êt' présenté, l'etât es'sa examinné, cèrtifié et sinné par les deux Auditeurs comme étant correct. San r'chu officiel es'sa donné pouor toutes souscriptions, donnâtions et argents r'chus, et i' paietha touos les comptes examinnés et cèrtifiés par lé Président en Conmité.
6 - Lé Ségrétaithe êcritha un rapport dé toutes les assembliées des membres et des rêunions du Conmité. I' conditha la correspondance au sujet d's affaithes dé L'Assembliée et du Conmité et rêpondra les lettres èrchues par la sociêté. Touos ses rapports es'sont êcrits dans la langue Jèrriaise, et la correspondance es'sa condite dans chutte langue-là autant qu'pôssibl'ye.
7 - Lé Président et touos l's Officièrs et l'Conmité condithont l's affaithes des assembliées ou rêunions dans la langue Jèrriaise.
8 - Dans les rêunions mensuelles ou en Conmité, si iun des membres démande pèrmission au Président dé s'exprînmer provisouaithement dans la langue Angliaîche ou Française viyant tch'il a tchiquechose d'împortance à suggéther et tch'i' n'peut pon l'exprînmer bein en Jèrriais, telle pèrmission lî s'sa accordée.
9 - Toutes pèrsonnes întérêssies dans l's objects d'la sociêté peuvent êt' membres, mais l'Conmité étha l'drouait d'èrfuser un membre proposé si ch'est dans l'întéthêt d'L'Assembliée. Les pèrsonnes présentes à l'Assembliée du 23 d'Novembre 1951 (naîssance dé L' Assembliée) ont ieu l'privilège dé joindre la sociêté.
10 - La souscription es'sa dgiex ch'lîns par an, payabl'ye lé preunmyi d'Octobre.
11 - Touos nouvieaux membres es' sont proposés et s'gondés par des membres actuels, par êcrit, sus des formes produites par L'Assembliée auve lé nom et l' adresse du membre à êt' proposé. Ches formes es' sont soumînses au Ségrétaithe pis considéthées par lé Conmité Exétchutif pouor être acceptées ou r' fusées comme lé Conmité en étha l'drouait. Les noms des membres èrquémandés par lé Conmité s'sont présentés à la préchaine assembliée pouor être êlus. Les cheins êlus entre lé preunmyi d' Avri et l'trente dé Septembre paiethont eune souscription d'chînq ch'lîns, et dgiex ch'lîns pouor les années en r'vénant. Les jannes gens en d'ssous d'seize ans pouôrront êt' proposés pouor joindre la sociêté et paiethont eune souscription d'un ch'lîn par an mais i' n' pouôrront pas voter ni êt' êlus membres du Conmité ni Officièrs, et eune fais tch'il' éthont dêpassé l'âge dé seize ans i' s'sont considéthés membres adultes et paiethont la souscription ordinnaithe dé dgiex ch'lîns.
12 - Pouor asseûther l'bein-être et l'succès d'L'Assembliée, les membres d'Conmité tchi n'veinnent pas à neuf rêunions sus douze duthant l'couothant d'eune année sans raison vâliabl'ye es'sont rempliaichis.
Viyiz étout: