|
Coquet, un jour, d'un autre Coq chantait, Je l'battrait je l'battrait! Quoicq'y sait montai sus l'haut jutcheux, Je l'en r'd'vallerai dans un coup ou deux !! De fiertai il en châtchait tel'ment la tête, Assais pardingue, pour kâzi en gâté sa crête Car il 'tait maître de certainne “ basse-Cour,” Où qu'il avait jugi, ma fingre, en un jour, Un basset, et un pigeon, mais il en fit trop— Car il y fut jouai par un malin “picot”— (Il érait voulu vais aitout un vier “ mêle,” Tchi a ses ordres avait étai rébêlle.—) Et dans san pouiaillyi, Mais tchi d'jiantre de brit!. Châque poul' où coquet En faisait du catquet— Car coumme lus maître y chantaient, Et entr'yieux y disaient— "Je l'battrons! Je I'battrons!" "Un' fais bas, Un' fais bas" Je l'tueu'rons, Je l'tueu'rons” Un' fais bas, Un' fais bas” Je l'mang'rons, Je l'mang'rons Un' fais bas, Un' fais bas !“ J'en f'rons t'y du joli tchernage, “J'l'y f'rons volé tout san biau ruouge pluimmage!” Le chein tchi faisait l'pus dé combat Etait un Coquet ; un “ Plymouth Rock” Counnu par ches caqueteurs ; Et partout ailleurs ; Pout un véthitable tu-où-anne casacq' !- Longtemps avec l'autre Coq il av-ait hantai ; Mais y changi, De poullailli ; Car y voulait sus l'pus haut jutcheux être piantai ! Mais chutte volaille N'était rein tchi vaille ; A forche de chanté, Et pis, de se vanté, Y firent a bein d'autres aitout a crère Que Coquet crève-tcheu 'tait seux de s'n'affaire, Et par orghi les glinnes yieux maîmes pensaient Tchi yiavait deux jaunes dans les oeux qui pounnaient! L'autre Coq escoutait tout, et y n'disait rein; San jutcheux 'tait solide, y le savait bein ; Quand maîme, ses esprons, 'Taient affilaies et longs, Et il tait un mio “gamme” de sa sorte... Chen tait pon p'tit crève-tcheu, Qu'érait damme janmais peu, Mettre yieun coumme l'y d'un coup à la porte ! Le jour pour le combat fut fixai, a la fin, Et chétait, nou m'a dit, un Vendredi matin, Par devant un aut' ouaisai de capacitai Qui s'y ercounnait coume y faut a ditai... Coquet devant Coq Parut un mio sot, Y né chantait pus coumme dans san poullaillyi, Quand y vit le coq d'gamme mâtai devant l'y! “ Gamme d'un pétit coup dé ses esp'rons L'estravelle et le met en meinchons Les plieummes du coquet volaient par chein par là; Coumme quand un' femme escrêde un vrat ! L'aut' ouaîsé, vit que coquet 'tait fichu, Et s'en moquant, dit deux mots au vaintchu, Y rêpondit, “J'en voulais pas tappé dessus; J'y ai 'tai poussai par des gens qui savaient mus! "Chest me tchi r'chait les coups, et chounna n'est pas fair !" L'ouaîsé dit “ Tu ne voulais pas ? tu'en avais djiantrement l'air! Coquet, Coquet, crèv'teheu, apprendras-tu enfin la raison; Tu vains pour te battre d'unne bein drôle de faishon; Car ergarde en bas, En v'là de biau travas! Car le Coq contre tchi tu voudrais te mâté A ses esp'rons trimmais avec du buoun acier!” "Pour té, ah puoure achocre, né vé tu pon Que les tchiens no sont faits, qu'avec du faillyi pliomb!” Coquet s'en r'fut tout triste dans san poullaillyi, D'peux qué les aut' coqs ne se moquissent de l'y; San buoun frère, qu'a yieu un tas de prix ès show, L'y fait la fête a le fiatte sus le dos; Car y veurs tâchi D'l'encuouragi; Et y compte que dans bein p'tit de temps, Avec huile duouche et onguents, Ses plieummes l'y r'veindront bein pus belles que de d'vant Mais auprès unne telle suaie, Et carcasse toute plieumaie, Coquet Crève-tcheu voudrait être laissi en r'pos!!! Mousieu se crait Malservi, tandis qui n'a 'tai, Par sa faute qu'un tout petit mio Picotai. |
Viyiz étout: