Les Pages Jèrriaises

Conseil d'Anmin ès Trinntais



Air: Toute l'Europe est sous les armes

Enfin je vait par la gazette
Que la Trinntait va s'évilli;
Des commitis la liste es faite.
Les uns crient: Vive Messervy.
Les autres, sans qu'il y pazaisse,
N'ont pas deux pie dans un chabot!
Y vont par toute la paraisse,
Criant: Vive maîte Jean Cabot!

Y ne faut pas que nou vos mêle!
Trinntais, ou l'êtes déjà trop! (ter)
Y faut tâssé à hed-ou-taile
Pour Messervy ou Jean Cabot.

Ne mettais pas la chose au pièze,
Ne remôquis pas les partis,
Car chette annais la viande es chièze
Le pain est à un divers prix.
Ou zêtes un tas de gens d'Eglise,
Ou n'avais jamais de procès,
Ou tâchis, quique nou zen dise,
Entre tous vous de vivre en paix.

Y ne faut pas que nou vos mêle!
Trinntais, ou l'êtes déjà trop! (ter)
Y faut tâssé à hed-ou-taile
Pour Messervy ou Jean Cabot.

Comme une paraisse a la chance!
Car comme nos dit la chanson,
“Entre les deux mon coeur balance”
Et tous les deux chés de qué bon.
Pour rempliechi Mousie Nicolle,
Si pouvaient s'agrès entre yeux,
Dans les Etats à tour de rôle
Y pourraient siégir tous les deux.

Y ne faut pas que nou vos mêle!
Trinntais, ou l'êtes déjà trop! (ter)
Y faut tâssé à hed-ou-taile
Pour Messervy ou Jean Cabot.

Quicun dit: faut settlé l'affaize
A coups de poing par le pue fort,
Mais mé je dis: Voulous me crèze,
Jouais une partie d'alfort.
Je siés seux que Mousieu Duhiaume
Et Tom Binet l'prédicateur,
Pourront sans qu'aucun ne le bliaume
Sam'di au sé joué un robeur.

Y ne faut pas que nou vos mêle!
Trinntais, ou l'êtes déjà trop! (ter)
Y faut tâssé à hed-ou-taile
Pour Messervy ou Jean Cabot.

Nou zéza biau dize et biau fèze,
La Trinntait va se distingui;
Lue candidats ne sont pas pièze
Qu'un tas que nou s'en va choisi.
Il est vrai qui zont prins modèle
Sue la ville, qui un matin
S'avizi d'en faize une belle
Et choisi le grand Dujardin!!!

Y ne faut pas que nou vos mêle!
Trinntais, ou l'êtes déjà trop! (ter)
Y faut tâssé à hed-ou-taile
Pour Messervy ou Jean Cabot.

Et chu savant là s'évertue
Tous les jours à tout réformé,
Et le travas qui fait le tue,
Y ne peut pue s'accliassé.
Car l'homme le pue fort au monde
Quiq'fais aitout en a trop fait,
Y faut quicun qui le SECONDE
Vint-ti même de la Trinntait.

 

L'Anmin Flippe

 

Viyiz étout:

 

Les Pages Jèrriaises