|
Pour du frait dans la tête, dans les reins ou dans l'dos, Des 'r'frédeuthes ès pis, ou des douleurs dans l's'os, J'vos donne un er'mède, chest l'sien qui m'a r'fait, Ch'est d'la soupe de patates avec raide de pouothai. Et ou vêrraiz dans p'ti d'temps l'êffet que v'la qu'éthà, Sus les poumons, la rate, les rignons, l'estoma; Et jusque ês 'r'frédeuthes, en éthont toutes sautai, Par le simplle moyen d'la soupe de pouothai. Et pis ch'nest pas tout, car l'er'miède qie j'vos donne, Est si bon pour les femmes, coumme il est pour l's'hommes, Chest la maine qui pouorrait vos en conté le r'fait, Du grand bein qou l'a r'chu par la soupe de pouothai. Et pour les vieilles gens chest raide souverain, Quant il ont l'cors dû, ou n'se trouvent pas trop bain, Chest tout d'suite, au sé, et d'vant lus mettre au llièt, Une bouonne bolaie d'soupe avec raide de pouothai. Et pis pour l's'êfans quant ils ont la rouojeulle, La fieivre êcarlate, ou une touche dé vétheule, I' n'faut pas perdre d'temps, mais toute suite et sans sai, Faut lus bailli d'la soupe avec raide de pouothai. Et pis pour les filles, dans touos âges et touos temps, Et principalement quant ils' ont l'mal ès dents, Pour les guéthi bain vite j'nen fais pas de sécrait, Chest d'la soupe qui lus faut avec raide de pouothai. Pour en dithe le vrai chest un er'miède pour touos moaux, Et qui bat toutes les drogues de d'siès Jean-Philipe Ethaut; Partichulièthement dans l'hivé quant i' fait une naithe frait, Quest qu'y'ia qui rêcauffe comme d'la soupe de pouothai? Je pouorrais continuai si seulement j'avais l'temps, A énuméthé l'bain s'ch'qou'l a fait pour des chants Chest pourquhi d'vant d'fini oquothe un mo sus l'sujet, N'oubliaiz pas j'vos en prie l'er'miède du pouothai.
J.L.F. |
Viyiz étout: