Mêrayieu n'est pas êffritée, - nou pouorrait quâsi dithe qu'ou' n'a peux d'rein, - et pourtant eune pouorre pétite souothie li fait eune peux terriblye! Quant oulle en vait ieune, ou' n'a que de s'touoner les sens. Ou' n'a pas d'peux d'un gros pêtre et j'l'ai veue attrapper un îmmense êtchèrbot et l'bailli à la catte, et quant oulle est mârrie nou dithait qu'ou' s'sait capablye d'étibotchi un tigre, - mais eune souothie est assez pour la faithe s'êvanni!
J'allis dans l'parleux l'aut' arlévée pour chèrchi l'portrait d'ma belle-méthe pour le donner à un gâs d'la ville pour l'enfrèmer, et j'trouvis ma pourre Mêrayieu début sus la tablye à t'nîn ses cotillons l'tou d'ses g'nouors. "Ah! mais, j'sis-t-i' contente que tu'est v'nu!" ou' m'dit: "J'tais finie d'êpousseter, et l'y'avait eune souothie dans l'armouaithe quand j'l'ai ouverte pour ramâsser mes bouans vèrres pour les laver! J'sis êpouvantée! Ch'est assez pour me donner l'coup d'la mort! Va vite ramâsser la Mînette et met-là dans l'armouaithe pour qu'oulle attrape chutte souothie-là!... Nouffé... Arrête eune munute, - quand j'y pense je n'sai pas s'tu dev'thais faithe chen'na, - ch'est eune souothie tch'est grosse comme un rat, et ou' pouorrait mordre la pouorre Mînnette tchi s'en va aver des p'tits cats! Nannîn, - j'crai qu'tu f'thas mus d'aller cherchi t'n'arme!"
"Ma pouorre femme," j'lî dis: "J'vai bein qu'tu'est toute ênèrvée, et qu'tu n'sai pas tch'est qu'tu dis. A c'menchi, n'y'à pas eune souothie dans tout Jèrri tch'est si grand comme un rat. Mème un mulot est pus grand qu'eune souothie, et il est bein liain d'êt' aussi gros comme un rat! Déscend dé d'sus la tablye, et j'm'en vais en souongni, d'la souothie."
"Ah mais dame nannîn!" Mêrayieu m'dit: J'né d'scendrais pas pour chent louis! Si la souothie allait ramonter amont mes cotillons!"
"Bah," - j'lî dis - "Vein-t'en que j'té porte dans la tchuisînne, ou' n'té f'thas pas d'ma quandis que j'sis-là!"
"Eh bein;" ou' m'rêponnit, en trembliant: "Ergarde que la porte d'l'armouaithe èssait bein freunmée et l'cliantchet mîns dévant qu'tut m'prenge autchun bord! Oh las! j'ai-t-i' ieu peux!"
"Freunme la porte quand tu sortithâs," ou' m'dit quand j'l'eus assise dans sa grand'-tchaise au pid du feu dans la tchuisînne, "Car ou' pouorrait bein èrvénîn ichin! Jamais j'n'oubliethai la fais qu'eune souothie ramontit amont l'dgéthé des braies de t'n'onclye quand i' tait à aîdgi a la machine-à-battre siez Mess Mêchèrvaise! I' n'savait pas trop bein tch'est que ch'tait qui grapinnait amont sa gambe, mais il eut la présence d'esprit de met' sa main d'sus et d'l'êcrâser entre ses drâses et ses braies! Ch'est d'mème tch'i' s'sauvit la vie!"
Comme Souky entrait dans la tchuisînne pour graie l'thée, Mêrayieu èrquémenchit à lî raconter la peux qu'ou' v'nait d'aver, et j'm'en allis chèrchi la Mînette pour la met' dans l'parleux. Chînq munutes pus tard, j'vîmes la catte èrvénîn auve eune pouorre petitie souothie à la goulle tch'était à la maintchi crue! Mêrayieu fît un brai quand ou la vit passer la porte en s'n'allant d'hors pour la mangi.
"Là! J'vouos disais bein, que ch'tait eune grosse souothie!" ou' nouos dit: "La pouorre Mînette a d'la peine à la porter! Oh mais! Tchi bonheur qu'ou' n'ma pas attatchie quand j'ai ouvert la porte d'l'armouaithe! J'en frémis quand j'y pense. J'mé d'mande pourtchi qu'y'à ieu d'itelles mêchantes bêtes dé mînses sur la tèrre à m'nichi la vie du monde!"
George d'La Forge
Les Chroniques de Jersey 14/2/1948
Viyiz étout: