Av-ous veu not' Frainque à ches drein? J'vos garantie qu'il est en bouonne santé! Mais, j'vos asseuthe qué dans les temps d'Nouë pâssé, il avait eune toux terribl'ye et i' n'pouvait pas s'en clièrgi! A la fin du compte, i' s'en fut vaie l'docteu qui l'sondi, li print du sang, èrgardi ava sa gorge, mais i' n'pouvait pas trouver autcheune chose dé ma auve li et i' li dit dé prendre un bouan verre caud avec au myi chaque sé et qu'i' devthait s'trouver mus dans deux-trais jours. Mais lé pouorre baloque né s'dgéthissait pas - i' continnuait à toutre piéthe qué janmais!
I' fut obliégi d'aller vaie l'docteu eune deuxième fais et l'affaithe en fini quand lé Frainque sé trouvi à l'Hôpita pour lé jour dans les bouans soins du Spécialist qui l'endormi pour faithe des examins. Danme, i' mint eune p'tite veue ava sa gorge, et, tandis qu'il en 'tait, i' 'rgardi amont étout, et il ordonni un X-ray, mais lé spécialiste vint à la conclusion qu'i' n'y avait rein d'ma auve not' gas et quand i' fut rêvillyi, lé docteu annonci qué Frainque n'avait autchun ma. et qu'i' pouvait s'en aller siez li, car lé spécialiste cryait qué ch'tait eune habitude dé toutre qu'il avait print. Mais Frainque toussait tréjous et la s'maine d'après sa femme, hardi gènée achteu, l'entraîni siez l'docteu acouo eune fais. Lé bouan vier médecin, qu'avait èrchu lé résultat du spécialiste, li dit: "Mon Frainque, j'ai lé r'miède pour té! J'm'en vais t'êcrithe eune prescription pour eune grand' boutillie d'sirop d'figues. Prends-en eune verrée à vin plienne trais fais par jour et j'té garantie qué tu t'en vas être dgéthi!"
"Ch'est eune TOUX qué j'ai, docteu, comment qu'du sirop d'figues s'en va clièrgi ma toux?"
"Man garçon" rêponnit lé bouanhomme "quand t'éthas print trais verrées d' sirop d'figues, tu n'OS'RAS PAS d'toutre!!!
Viyiz étout: