J'avons chèrfouoilli dans l'pagas chu mais et j'avons trouvé un p'tit souv'nin.
I' y a deux ou trais ans, à la fin d'Mai, quand j'taimes à pâler de fées et de p'tits faîtchiaux, j'décidîmes d'aller jusqu'à la Fontaine des Mittes pa'ce qu'au mains à la maintchi d'nous né l'avaient janmais visitée.
J'stationnîmes nos motos près de iun des grands clios d'Egypte et j'prinmes lé large c'min entre les clios labouothés jusqu'à la crête dé la falaise. D'ichin, nou viyait la côte dé France tch'èrlisait au solé et le bliu d'la mé calme et j'arrêtîmes pouor eune pause à 'rgarder la belle veue avant d'èrprendre lé c'min tchi d'vallait jusqu'à la fontaine.
Excités, j'couorrîmes pouor vaie tchi qui s'en allait y arriver lé preunmyi, mais les derniéthes dgiex verges du p'tit êtrait c'min 'taient bouchies et impassabl'ye à cause des ronches et dé la sercl'ye. Presqué tous dans la classe 'taient désolés - tchi faithe? Mais, quatre d'entre nous qui connaissaient l'endrait hardi bein, dêhallitent des sécateurs dé nos pouchettes et j'nos minmes tous à coper les gros tigots des ronches et j'hallîmes la haute sercl'ye pouor trouver le fonds du c'min.
Arrivés tout près d'la fontaine nou n'viyait rein. Lé ieau couorrait par dessus nos souliés et des chues et du bas, trais pids d'haut, nos barraient la veue d'la fontaine. Oubliant nos pids mouoillis, j'dérachinnimes les chues et lé bas, et couverts de pité, j'arrivîmes à la fontaine. Mais, malgré que l'ieau couorrait dé souos l'rotchi, d'la pierre avait tchaie de la falaise et, boulversés par le d'dgas devant nous, avec nos mains, j'clièrgîmes la terre et l'pité. J'bâtîmes eune petite muthâle pouor garder l'ieau d'la fontaine, et dans rein d'temps j'avaimes un p'tit c'min assez sé pouor pouver y arriver.
Pouor nos 'rposer, j'fûmes nos assiéthe parmi les p'tites flieuthes et l'herbe courte, tout prêt. 'Ch'est chin que les p'tits faîtchiaux vennent danser au sé' dit ieune des pus avisées d'entre nous. 'Et bein,' j'dîmes 'dit-nous l'histouaithe dé la fontaine, don.' Ev-chin tchi qu'ou nos dit:
|
Arna et Aiuna, deux p'tits faîtchiaux qui 'taient gardgiens des fontaines et canniaux, avaient d'meuthé ensemblye pouor tchiques siéclyes dans eune cave à Belle Hougue. Durant chu temps là, rein ne s'sait arrivé à troubl'yer ni lus vie ni lus amour ieun pouor l'autre. I trouvaient pliaisi dans la natuthe autou d'ieux, dans les prés pliens d'violettes et d'flieuthes tchi né s'fanaient janmais, du jonc et d'la feugiéthe et dans l's ieaux tchi couorraient ava les falaises et pis dans la mé. Lus simplye mangi, mucri auve les rosées du ciel, 'tait servi sus l'aithe dé lus cave et, là, i' vivaient en paix et trantchilité. Mais tout 'tait sus l'point d'changi - les deux, ayant vêtchu lus vie sus chutte terre, s'en allaient vivre au ciel éyoù qui lus en allaient trouver eune autre paix, la vie êtèrnelle et la jouaie pouor tréjous. Un sé, au S'tembre, quand i' 'taient assis à r'garder lé solé couochant, eune veue aveugliante lus apparu et i'vitent eune ange tchi volait envers ieux et i' ouïtent san message: 'Arna et Aiuna. j'dais vos condithe à la maison prépathée pouor vous parmi l's êtailes, éyoù qu'ous allez joui de la félicité êtèrnelle.' Et, avec l'ange coumme dgide, chantant lus èrmerciements, i' lus envolitent. Mais, i' vintent à penser qui n'èrvendraient janmais vaie chutte belle Ile dé Jèrri auve ses caves et ses flieurs. Chenna lus donni un moment d'tristesse et, eune lèrme dé châtchun tchi sus la terre dé Belle Hougue et eune petite source se mint à couorre d'eune craque dans l'rôtchi. Ch'est coumme chenna que Arna nos ont laissi la Fontaine des Mittes pouor nos dgêthi les maux ès iers pouor tréjous. |
Chatchun d'nous, avec ses pensées, se lavit les ièrs avec l'ieau d'la fontaine et j'nos en fûmes pouor monter lé large c'min jusqu' aux motos. Arrivés à haut, j'viyaimes la lueu du solé couochant et iun des garçons dit: 'Rouoge ciel au sé - Dgèrnésy est à feu.' J'nos bouffîmes tous à rithe.
Viyiz étout: