Temps pâssé, les gens criyaient qu'les p'tits faîtchieaux d'meuthaient dans l'vaîsinné des pouquelayes (ou dolmens), et qué ch'fut ieux tchi les bâtîtent.

I' 'taient des touos p'tits bouanshommes - eune vielle race dé criatuthes qu'les hommes avaient cachis d'la tèrre et tchi lus muchent ach'teu dans les freunmionniéthes et les pouquelayes.

Les supèrstitieurs avaient peux d'disteurber les pièrres des pouquelayes, et l's anciens explyitchaient les grandes pièrres qu'nou trouvait dans les clios en disant qu'les p'tits faîtchieaux l's avaient laîssi tchaie en les transportant.

I' portaient des d'vantchieaux, et soulaient faithe sèrvi ches d'vantchieaux pouor transporter les pièrres.

L's anciens disaient étout qué s'nou laîssait des j'vaux en d'houors, les p'tits faîtchieaux prendraient les j'vaux pouor aller faithe des touônnées et faithe couôrre des courses duthant la niet. Les j'vaux ères'saient à lus pliaiches acouo eune fais lé matîn. Un j'va tchi 'tait fait sèrvi par les p'tits faîtchieaux 'tait tréjous gras et bein souongni.

Dans l'vaîsinné dé Handouais, nou soulait ouï l'son dé p'tites clioches tch'annoncit eune procêssion d'mathiage des p'tits faîtchieaux.

Nou-s'a veu étout, à St. Ouën, eune procêssion d'entèrrement des p'tits faîtchieaux, auve un p'tit coffre des morts.

I' sembl'ye étout qu'les p'tits faîtchieaux avaient lus crînminnels et malfaîteurs - et tchi'i' 'taient condamnés à êt' pendus dé d'ssus des tigues dé chour dans les clios la niet.

Y'a un tas d'aut's histouaithes entouor les p'tits faîtchieaux.