Tch'est qui n'a pon entendu pâler du Bélengi? Les vièrs, i' pathaît, pus qué d'nouos temps, connaissaient ch'la tout à fait bein. Nou l'viyait tchiquefais la niet, ofûche quand i' bliâsait, par sus un pré sustout et tchiquefais dans un chînm'tchiéthe. En France nou-s-appelle chenna "Feu follet". Et ch'tait connu en Dgèrnésy étout, souos l'nom “Bélengier” or “Bélenger”, et en Nouormandie, où'est qu'nou l'appelle “Le Balongié”. En Jèrri nou dit Bélengi dans l'Ouêst, mais à La Mouaie Bélengié et dans l'Êst Bélengé. En Angliétèrre ch'est le “Will o' the wisp”, “Jack o' Lantern” ou, dans l'Êst d'l'Angliétèrre, “Billinger”.
Nou viyait don ch't' appathition, souo-disant, en dssus d'un mathais, un pré, etc., tch'était eune veue ou lueu tchi dansicotait à eune cèrtaine hauteu d'tèrre et nou disait qué lchein tch'êprouvait à siéthe Lé Bélengi s'trouv'thait bein vite enfanné et pèrdu.
Dans nouot' jannesse nou nouos en pâlait acouo et cèrtaines dé nouos gens y criaient fiabliément comme bein d'autres. Et, n'y'a pon tant d'années, d'chenna. Y'a sans doute bein d's anciens acouo à ch't heu tchi vouos en racont'taient d's histouaithes d'aut'fais. Et nou s'rappelle qué, comme avièrs, nou-s-avait eune fichue peux d'tout chenna. Par exempl'ye, quand nou ouiyait l'cri d'la huppe ou d'un cahouain, ou qu'eune êtaile filait à travèrs lé ciel, ou ofûche qué nou viyait eune lueu au liain (p't-êt' tchitchun crouaîsant un clios atout un leunmîngnon d'lantèrne) - dgiâtre sait mort, d'ité pouvait vouos donner la frousse et vouos mettre tout d'suite dans l'idée, Lé Bélengi, Lé Balle-à-leunettes, des Cocangnes, des Blianches-femmes et dgiâtre sait tchi !
Ah ça, quant à l'histouaithe ou légende entouor chenna, i' pathaît qué v'là tchi nouos veint des pays du Nord - d'la Scandinavie. Bélengi, ou Voelundr, était l'homme d'eune Valkyrie. I' possédait un trésor et i' fut maltraité cruellement par un jarl ou prînce tchi voulait s'empather d'chu trésor. I' fut emporté sus eune île et eut les nèrfs des pids copés pouor l'empêchi d' s'êcapper. Lé jarl lé forchit à travailli pouor li ; mais Bélengi, tch'était bein au-fait, fit eune forge, et pis il ag'vit les deux fis d'san maître et atout lus os fît des vaissieaux d'tabl'ye. Il eut sa r'venge autrément étout, et pis, comme fîn, s'envolit dans l's airs. L'histouaithe dit qué l'Destîn l'condâmnit à viagi niet auprès niet dans l's airs atout sa forge, et qu'ch'est l's êpars dé chutte forge qué nou vait tchiquefais comme appathition.
Né v'là, don, bouonnes gens, l'histouaithe ou légende dé l'originne du Bélengi.
Viyiz étout: